واشنگٹن ۔24 اپریل ۔( سیاست ڈاٹ کام ) نیا کورونا وائرس سورج کی روشنی میں بہت جلد ناکارہ ہو جاتا ہے۔ امریکہ میں محکمہ ہوم لینڈ سکیورٹی کیلئے سائنس اور ٹیکنالوجی امور کے مشیر ولیم برائن نے وائٹ ہاؤس میں گزشتہ روز بتایا کہ بالائے بنفشی شعائیں وائرس پر اثر انداز ہوتی ہیں۔ برائن ایک تحقیق کے بعد اس نتیجے پر پہنچے تاہم اس تحقیق کے نتائج عام نہیں کیے گئے۔ 21سے 24 ڈگری سینٹی گریڈ درجہ حرارت میں وائرس کے کارآمد رہنے کی صلاحیت میں پچاس فیصد کی کمی نوٹ کی گئی۔ اس تحقیق کے ابتدائی نتائج سے یہ امید قائم ہو گئی ہے کہ موسم گرما کووڈ انیس کے پھیلاؤ کو روک سکتا ہے۔ تاہم تحقیق میں بہت سے پہلوؤں کی ابھی تصدیق باقی ہے۔
