نئی دہلی۔16 مئی ( سیاست ڈاٹ کام)انگلینڈ کے سابق کپتان اور بائیں ہاتھ کے سرکردہ بلے باز ڈیوڈ گاور کا خیال ہے کہ ہندوستانی کرکٹ کنٹرول بورڈ (بی سی سی آئی) کے صدر سورو گنگولی میں ایک اچھے ایڈمنسٹریٹر کی تمام خصوصیات موجود ہیں اور وہ مستقبل میں کرکٹ کے عالمی ادارے آئی سی سی کے صدر بن سکتے ہیں۔گاور نے فینس انٹرایکٹئو شو گلوفینس کے ساتھ بات چیت میں کہا کہ گنگولی ایک دن خود کو بین الاقوامی کرکٹ کونسل (آئی سی سی) میں پائیں گے لیکن ان کا یہ بھی ماننا ہے کہ بی سی سی آئی کا عہدہ سنبھالنا کسی بھی دن ایک بڑا کام ہے۔انگلینڈ کے سابق کپتان گاور نے گنگولی کی بی سی سی آئی کے سپرباس کے طور پر تقرری کی حمایت میں تعریف کی ہے۔گاور نے تسلیم کیا کہ دادا کے نام سے مشہور گنگولی ایک دن آئی سی سی صدر بن سکتے ہیں۔انہوں نے کہا کہ گنگولی کے پاس وہ تمام خصوصیات ہیں جو ایک اچھے ایڈمنسٹریٹر کے لئے ضروری ہیں۔گاور نے کہا کہ میں آپ کو سوربھ کے بارے میں کیا بتا سکتا ہوں۔ میں نے برسوں ان کے ساتھ کئی بار بات چیت کی ہے۔وہ ایک بہت ہی بہترین کھلاڑی تھے اور اس کے ان کے ریکارڈ خود گواہ ہیں۔ایک بات جو میں نے گزشتہ چند سالوں میں سیکھی ہے، وہ یہ ہے کہ اگر آپ بی سی سی آئی کو چلانے جا رہے ہیں، تو آپ میں بہت سی چیزیں ہونی چاہئے۔ان جیسی شہرت ، وہ بہت اچھی شروعات ہے، لیکن آپ کو بہت ہی شائستہ سیاستدان ہونے کی ضرورت ہے۔