سوشیل میڈیا پر نفرت انگیز پوسٹ پر سخت انتباہ

   

سنگاریڈی میں ادخال پرچہ نامزدگی کے انتظامات کا جائزہ ، ضلع ایس پی کا خطاب
سنگاریڈی27 نومبر (سیاست ڈسٹرکٹ نیوز ) پریتوش پنکج ایس پی ضلع سنگا ریڈی نے پہلے مرحلے کے مقامی پنچایت انتخابات کیلئے (نومینیشن) کا عمل شروع ہوتے ہی مختلف منڈل ہیڈکوارٹرز میں قائم نامینیشن مراکز اور حساس پولنگ اسٹیشنوں کا دورہ کرکے سیکیورٹی انتظامات کا جائزہ لیا اس موقع پر افسران سے گفتگو کرتے ہوئے انہوں نے ہدایت دی کہ نامینیشن کا عمل پْرامن طریقے سے مکمل ہو، اس بات کو یقینی بنایا جائے۔ نامینیشن مراکز کے قریب 100 میٹر کا علاقہ نشان زد کرکے کسی بھی غیر متعلقہ فرد کو وہاں داخل نہ ہونے دیا جائے۔ انہوں نے کہا کہ امیدوار اپنے کاغذاتِ نامزدگی صبح 10:30 سے شام 5 بجے کے درمیان ہی داخل کرسکیں گے۔ ہر امیدوار کے ساتھ صرف تین افراد کو اندر آنے کی اجازت ہوگی عوام سے اپیل کرتے ہوئے ایس پی نے کہا کہ اگر کوئی شخص پیسے، شراب، کرکٹ کٹس یا اس طرح کی دیگر چیزیں تقسیم کرکے ووٹروں کو لالچ دینے یا متاثر کرنے کی کوشش کرے تو فوراً مقامی پولیس کو اطلاع دیں انہوں نے واضح کیا کہ سوشل میڈیا پر کسی شخص یا سیاسی جماعت کے خلاف نفرت انگیز، توہین آمیز یا حساسیت کو مجروح کرنے والی پوسٹ یا فارورڈ میسج کرنے والوں کے خلاف بھی الیکشن کمیشن کے ضابطہ اخلاق کے تحت سخت کارروائی کی جائے گی۔