واشنگٹن : سعودی نائب وزیر دفاع شہزادہ خالد بن سلمان نے واشنگٹن میں امریکہ کی قومی سلامتی کے مشیر جیک سولیون سے ملاقات کی۔ دونوں شخصیات کے درمیان سعودی عرب اور امریکہ کے تعلقات مضبوط بنانے کے طریقوں پر بات چیت ہوئی۔چہارشنبہ کے روز اپنی ٹویٹ میں شہزادہ خالد نے بتایا کہ امریکی ذمہ دار کے ساتھ گفتگو میں مملکت اور امریکہ کے مشترکہ تعلقات زیر بحث آئے۔سعودی سرکاری خبر رساں ایجنسی (ایس پی اے) کے مطابق ملاقات میں دونوں ملکوں کے تاریخی تعلقات اور دونوں ملکوں کے بیچ تعاون اور رابطہ کاری مضبوط بنانے کا جائزہ لیا گیا۔ملاقات میں امریکہ میں سعودی عرب کی خاتون سفیر شہزادہ ریما بنت بندر بن سلطان ، یمن کے لیے سعودی سفیر محمد بن سعید آل جابر ، وزیر دفاع کے عسکری مشیر میجر جنرل انجینئر طلال بن عبداللہ العتیبی کے علاوہ سعودی نائب وزیر دفاع کے دفتر کے ڈائریکٹر ہشام بن عبدالعزیز بھی موجود تھے۔اس موقع پر امریکہ کی جانب سے قومی سلامتی کونسل میں مشرق وسطی اور شمالی افریقہ کے امور کے رابطہ کار بریٹ میک گورک بھی موجود تھے۔
