نئی دہلی، یکم اگست (یواین آئی) وزیر دفاع راج ناتھ سنگھ نے سول اور فوجی اہلکاروں کے درمیان بہتر تال میل پر زور دیتے ہوئے کہا ہے کہ جب یہ دونوں مل کر قومی مفاد میں کام کرتے ہیں تو ملک کا سیکورٹی ڈھانچہ اور بھی مضبوط ہو جاتا ہے ۔ جمعہ کو یہاں آرمڈ فورسز سول سروسز ڈے کے موقع پر منعقدہ ایک پروگرام سے خطاب کرتے ہوئے مسٹر سنگھ نے وزارت دفاع کے حکام سے کہا کہ وہ سول اور فوجی اہلکاروں کے درمیان تال میل بڑھانے کے بارے میں سوچیں۔ انہوں نے کہا کہ اس بات پر غور کیا جانا چاہئے کہ سول سروسز کو زیادہ سے زیادہ حصہ ڈالنے کے مواقع کیسے فراہم کیے جا سکتے ہیں۔ ان کا کہنا تھا کہ جب سول اور ملٹری سروسز مل کر قومی مفاد میں کام کرتی ہیں تو ملک کا سیکیورٹی ڈھانچہ مزید مضبوط ہوتا ہے ، یہ ہمارا عزم بھی ہونا چاہیے ۔ انہوں نے دنیا بھر میں غیر یقینی کی صورتحال کا ذکر کرتے ہوئے کہا کہ ایسی صورتحال میں سول ملٹری کوآرڈینیشن کی اہمیت بڑھ گئی ہے ۔ انہوں نے کہا کہ آج کے دور میں سول ملٹری کوآرڈینیشن کی اہمیت بڑھ گئی ہے کیونکہ آج کی دنیا بہت غیر یقینی ہو چکی ہے ، آج ہم یہ اندازہ نہیں لگا سکتے کہ دنیا کے وہ علاقے جو آج پرامن ہیں، انہیں مستقبل میں کشیدگی کا سامنا نہیں کرنا پڑے گا، ذرا خود سوچیں، تین چار ماہ پہلے ہم نے کبھی نہیں سوچا تھا کہ ہمیں آپریشن سندور کرنا پڑے گا، ہم نے کبھی نہیں سوچا تھا کہ ہمارے دروازے پر جنگ جیسے حالات آئیں گے ۔ جنگی تیاریوں میں سول سروس کے کردار کو اہم قرار دیتے ہوئے انہوں نے سول سروس کے اہلکاروں سے کہا کہ وہ بدلتی ہوئی ضروریات کے مطابق خود کو تیار کریں کیونکہ اس وقت پوری دنیا جس صورتحال سے دوچار ہے اس میں معمولی سی کوتاہی یا غلطی کی بھی کوئی گنجائش نہیں ہو سکتی۔
انہوں نے کہا کہ سول سروس نے آپریشن سندور میں فوج کا بھرپور ساتھ دیا اور اپنا کردار بخوبی ادا کیا۔
