خرطوم: سوڈان کے معزول صدر عمر البشیر کے وکلا دفاع نے بتایا کہ سابق صدر کے کورونا کا شکار ہونے کی خبروں میں کوئی صداقت نہیں۔معزول صدر عمر البشیر کے وکلا دفاع پر مشتمل کمیٹی کے رکن ابو بکر الجعلی نے بتایا کہ ان کے موکل کی حالت بہتر ہے ۔ انہوں نے کہا کہ سابق صدر علیل ہیں مگر وہ کرونا کا شکار نہیں ہوئے ہیں۔ الجعلی نے عدالت سے اپیل کی کہ وہ عمر البشیر کو جیل سے باہر طبی معائنہ کرانے اور جیل کے اندر بہتر طبی سہولیات کی فراہمی کی اجازت دے ۔منگل کو معزول صدر عمر البشیر کے خلاف سنہ 1989ء انقلاب کے ماسٹر مائنڈ کے مقدمہ میں البشیر موجود نہیں تھے جس سے ان کی صحت کے بارے میں کئی طرح کی قیاس آرائیاں کی گئیں۔اس موقع پر عدالت نے کہا کہ ضرورت پڑنے پر عمر البشیر کو اسپتال لے جانے کے احکامات جاری کیے جائیں گے ۔
