اسٹاکہوم۔ 10 جون (سیاست ڈاٹ کام)سویڈن کے 1986 میں قتل کر دیے گئے وزیر اعظم اولوف پالمے کے قتل کی چھان بین 34 سال بعد عملاًروک دی گئی ہے۔ یہ بات چہارشنبہ کے روز ریاستی دفتر استغاثہ نے بتائی۔ وجہ یہ بتائی گئی کہ اس قتل کا مرکزی مشتبہ ملزم سویڈن ہی کا ایک شہری تھا، جو 2000ء میں انتقال کر گیا تھا۔ اس بارے میں چیف پراسیکیوٹر کرِسٹر پیٹرسن نے اسٹاکہوم میں بتایا کہ اس ملزم سے اب نہ تو پوچھ گچھ کی جا سکتی ہے اور نہ ہی اس پر کوئی فرد جرم عائد کی جا سکتی ہے۔ اولوف پالمے کو 28 فروری 1986ء رات وسطی اسٹاکہوم میں سنیما سے گھر واپس جاتے ہوئے گولی مار دی گئی تھی۔
