سپریم کورٹ نے دہلی کو ہریانہ سے ملانے والی سنگھو سرحدکوخالی کرنے کی درخواست پر سماعت کرنے سے انکار کر دیاجوکسانوں کے احتجاج کی وجہ سے بندہے۔ عدالت نے کہاہے کہ درخواست گزار کو پنجاب ہریانہ ہائی کورٹ میں اپنی درخواست دائر کرنے کی تجویز دی گئی ہے۔ سپریم کورٹ میں سونی پت کے دو لوگوں نے اپنی درخواست میں کہا تھا کہ سڑک کئی مہینوں سے بند ہے ، لہٰذا سپریم کورٹ حکومت کو ہدایت کرے کہ وہ سڑک کھولے یا دوسری سڑک بنانے کا حکم جاری کرے ، تاکہ لوگ آ سکیں۔ جسٹس ڈی وائی چندرچوڑ نے کہا ہے کہ ہمارے لیے اس معاملے میں مداخلت کرنے کی کوئی وجہ نہیں ہے۔ جب ہائی کورٹس موجود ہوں اور وہ مقامی حالات سے پوری طرح آگاہ ہوں کہ کیاہو رہا ہے۔ ہمیں ہائی کورٹ پر اعتماد کرنا چاہیے۔ اس مشاہدے کے ساتھ ، سپریم کورٹ نے درخواست گزاروں کو ہائی کورٹ سے رجوع کرنے کا حکم دیا۔ اس کے بعد ان کی جانب سے درخواست واپس لے لی گئی۔ عدالت نے کہا ہے کہ درخواست گزار ہائی کورٹ میں درخواست دائر کرنے کی آزادی رکھتا ہے۔
