حیدرآباد ،23 نومبر (یو این آئی) ڈرائیونگ لائسنس کی تجدید کے لئے جانے کے دوران پیش آئے سڑک حادثہ میں ساس اور بہو موقع پر ہی ہلاک ہوگئے ۔یہ حادثہ تلنگانہ کے ضلع رنگاریڈی کے آدی بٹلہ پولیس اسٹیشن حدود کے راگنا گوڑم گیٹ ساگر ہائی وے پر اُس وقت پیش آیا جب اسکوٹی پر جانے والی ساس اور بہو جن کی شناخت کوتہ پیٹ کی رہنے والی 56سالہ رما(ساس)اور 24سالہ ہیماجی(بہو)کے طورپر کی گئی ہے کی اسکوٹی کوتیز رفتار ٹپر لاری نے ٹکردے دی۔حادثہ اتنا شدید تھا کہ دونوں خواتین موقع پر ہی ہلاک ہوگئیں۔حادثہ کا مقام دلخراش منظر پیش کررہا تھا۔یہ دونوں خواتین ڈرائیونگ لائسنس کی تجدید کے لئے جارہی تھیں کہ منوگوڑہ آرٹی سی آفس کی سڑک پر یہ حادثہ پیش آیا۔ساس رما آندھرا بینک کی ملازمہ ہے ۔حادثہ کی اطلاع ملتے ہی پولیس مقام حادثہ پر پہنچ گئی جس نے لاشوں کو پوسٹ مارٹم کے لئے بھیج دیا۔پولیس نے اس سلسلہ میں ایک معاملہ درج کرکے جانچ شروع کردی۔
