مرزا پور-پریاگ راج ہائی وے پر بس اور بولیرو میں ٹکر
لکھنؤ : اتر پردیش کے پریاگ راج میں جمعہ اور ہفتہ کی درمیانی شب ایک بھیانک سڑک حادثہ پیش آیا جس میں بولیرو اور بس کے درمیان شدید ٹکر ہوئی۔ اس حادثے میں 10 یاتری ہلاک ہوگئے جبکہ 19 افراد زخمی ہوئے ہیں۔ یہ حادثہ پریاگ راج۔مرزا پور ہائی وے پر میجا علاقے میں پیش آیا۔پولیس کے مطابق مرنے والے تمام افراد چھتیس گڑھ کے کوربا ضلع سے آئے تھے اور پریاگ راج کے مقدس سنگم میں اشنان کرنے کے بعد بولیرو میں واپس جا رہے تھے۔ حادثہ رات تقریباً 2 بجے اس وقت پیش آیا جب ایک تیز رفتار بولیرو مخالف سمت سے آ رہی بس سے ٹکرا گئی۔ ٹکر اتنی شدید تھی کہ بولیرو کا اگلا حصہ مکمل طور پر تباہ ہو گیا اور گاڑی پچک کر رہ گئی۔حادثے کے بعد موقع پر افراتفری مچ گئی۔ مقامی لوگوں اور راہگیروں نے فوراً پولیس کو اطلاع دی۔ پولیس کے موقع پر پہنچنے کے بعد راحت اور بچاؤ کا کام شروع کیا گیا۔ زخمیوں کو فوری طور پر قریبی اسپتال منتقل کیا گیا، جبکہ شدید زخمی افراد کو ضلع ہاسپٹل بھیجا گیا۔ مرنے والے یاتریوں کی نعشوں کو پوسٹ مارٹم کیلئے بھیج دیا گیا ہے۔بولیرو میں سوار 10 عقیدت مندوں کی موت کے علاوہ، حادثے میں بس میں سوار 19 عقیدت مند بھی زخمی ہوئے ہیں۔ یہ تمام عقیدت مند سنگم میں اشنان کرنے کے بعد وارانسی جا رہے تھے۔ زخمیوں کو ابتدائی علاج کیلئے سی ایچ سی رام نگر ہاسپٹل میں داخل کرایا گیا ہے۔پولیس حادثے کی وجوہات کی جانچ میں مصروف ہے۔ ابتدائی تحقیقات کے مطابق تیز رفتاری اور اندھیرے کے سبب حادثہ پیش آیا۔ تاہم پولیس تمام پہلوؤں پر غور کر رہی ہے۔