واشنگٹن :سکھ رہنما کے قتل کی سازش میں ملوث ہونے پر امریکہ نے بامعنی تحقیقات تک ہندوستان کو 3 ارب ڈالر کے ڈرونز کی فروخت روک دی۔ہندوستانی میڈیا کے مطابق امریکہ نے ایم کیو نائن اے 31 سی گارڈین اور اسکائی گارڈین ڈرونز ہندوستان کو فراہم کرنا تھا تاہم سکھ رہنما گرپتونت سنگھ پنوں کے قتل کی کوشش پر ڈرونز کی خریداری امریکی کانگریس میں مسترد ہوگئی۔ہندوستانی میڈیا کا بتانا ہے کہ امریکی نمائندوں نے ہندوستان کو ڈرونز کی فروخت کیلئے درکار قانونی کارروائی کو منجمد کر دیا۔میڈیا رپورٹس کے مطابق امریکی محکمہ خارجہ نے ہندوستان کو ڈرونز کی فروخت روکے جانے پر ردعمل سے گریز کیا ہے جبکہ ہندوستانی بحریہ اور ہندوستانی وزارت خارجہ کے حکام بھی رپورٹ پر ردعمل دینے سے گریز کر رہے ہیں۔خیال رہے کہ کچھ عرصہ قبل کینیڈا میں سکھ رہنما کے قتل کی سازش میں ہندوستانی سفارتی عہدیداروں کے ملوث ہونے کے ثبوت پائے گئے تھے جس کے بعد امریکہ میں بھی سکھ رہنما گرپتونت سنگھ پنوں کے قتل کی سازش کا منصوبہ امریکی خفیہ اداروں نے ناکام بنایا تھا اور اس سازش میں بھی ہندوستان کے ملوث ہونے کے شواہد ملے تھے۔امریکہ اور کینیڈا نے ہندوستان سے سکھ رہنماؤں کے قتل اور ان کے قتل کی سازش کے الزام کی تحقیقات میں معاونت کرنے کا مطالبہ کر رکھا ہے۔