ممبئی ۔ بالی ووڈ کے سوپر اسٹار شاہ رخ خان کی اداکاری ساری دنیا میں مشہور ہے لیکن ان کی بیٹی سہانا خان کو سوشل میڈیا پراداکاری کی وجہ سے ٹرولنگ کا سامنا کرنا پڑگیا، وجہ ایک اشتہار میں ان کا کام کرنا ہے۔ جب بھی کسی سوپر اسٹارکا بچہ اپنا فلمی کیریئر شروع کرتا ہے تو لوگ اس کا موازنہ ان کے والدین سے کرنے لگتے ہیں۔پہلی فلم کی ریلیزکے ایک سال بعد سہانا خان ایک بار پھر سرخیوں میں ہیں اور سوشل میڈیا پر تنقید کا سامنا کررہی ہیں۔ سوشل میڈیا پر سہانا خان کی اداکاری کے ساتھ ساتھ ان کے فلمی پس منظر بھی سوال اٹھائے جارہے ہیں، اور وہ موبائل فون کے ایک اشتہار کی وجہ سے ٹرولنگ کا سامنا بھی کررہی ہیں۔ اس اشتہار میں سہانا کا ایک مختصر ڈائیلاگ ہے، جس کے بعد وہ اپنے ڈانس مووز کے ساتھ میوزک ویڈیو میں نظر آتی ہیں۔ تاہم جیسے ہی یہ کلپ سوشل میڈیا پر سامنے آیا، صارفین نے تنقید شروع کردی۔ صارفین کی جانب سے شاہ رخ خان کی بیٹی کے انتخاب اور ان کی اداکاری کو شدید تنقید کا نشانہ بنایا جارہا ہے ۔ ایک صارف نے کہا کہ شاہ رخ خان جتنی بھی کوشش کرلیں وہ اپنی بیٹی کو اسکرین پرکامیاب نہیں کرواسکتے۔ تاہم کچھ لوگوں کا کہنا ہے کہ کیا ایک اشتہارکسی اداکار کے کیریئر کے بارے میں فیصلہ کرنے کے لیے کافی ہے؟ سہانا مستقبل میں اپنی اداکاری کے ذریعے ناقدین کو جواب دیں گی۔ یہ وقت ہی بتائے گا کہ سہانا خان اپنی اداکاری کے ذریعے ان تبصروں کو پیچھے چھوڑ پائیں گی یا نہیں۔
