یو پی اسمبلی اجلاس کے آخری دن کانگریس کا انوکھا احتجاج
لکھنؤ: کانگریس نے جمعہ کو مرکزی وزیر مملکت برائے داخلہ اجے مشرا ٹینی کو برخاست کرنے کا مطالبہ کرتے ہوئے اسمبلی کے باہر سیاہ غبارے اڑا کر انوکھا احتجاج کیا۔ اسمبلی کے سرمائی اجلاس کے تیسرے اور آخری دن کی کارروائی شروع ہونے سے قبل پارٹی کے ریاستی صدر اجے کمار للو کار سے سیاہ غباروں کا ایک گچھا لیکر ودھان بھون پہنچے اور غبارے ہوا میں اڑانے لگے۔ اس دوران وہاں موجود سیکورٹی اہلکاروں نے للو کے ہاتھ سے غبارے چھیننے کی کوشش کی۔ جھگڑے کے درمیان للو چار یا پانچ غبارے اڑانے میں کامیاب ہو گئے۔اجے کمار للو نے کہا کہ مرکزی وزیر داخلہ امت شاہ آج لکھنؤ میں ہیں۔ وہ جانتے ہیں کہ لکھیم پور کھیری کیس کی ایس آئی ٹی رپورٹ آچکی ہے، جس میں صاف ہے کہ ایک سوچی سمجھی سازش کے تحت بے گناہ کسانوں کو روند کر موت کے گھاٹ اتار دیا گیا ہے۔ اس سازش میں مرکزی وزیر مملکت برائے داخلہ اجے مشرا ٹینی کے ملوث ہونے کا قوی امکان ہے۔ یہ جانتے ہوئے کہ وہ تحقیقات پر اثر انداز ہو سکتے ہیں، مرکزی حکومت ٹینی کو برطرف نہیں کر رہی ہے، جو کسانوں کے ساتھ سراسر ناانصافی ہے، جسے کانگریس بالکل برداشت نہیں کرے گی۔ ٹینی کی برطرفی تک کانگریس کا احتجاج جاری رہے گا۔
