رامپور: سماج وادی پارٹی کے رکن پارلیمان اعظم خان اترپردیش اسمبلی الیکشن میں اپنی امیدواری کیلئے پرچہ نامزدگی جیل سے ہی داخل کریں گے ۔ متعدد مجرمانہ معاملوں میں سیتا پور جیل میں قید اعظم کو عدالت نے جیل سے ہی پرچہ داخل کرنے کی اجازت دی ہے ۔اعظم کو ایس پی نے رامپور صدر سیٹ سے اسمبلی الیکشن میں امیدوار بنایا ہے ۔ عدالت کی اجازت سے اعظم خان جیلر کی موجودگی میں نامزدگی کی کاروائی پوری کریں گے ۔جیل سے اعظم خان کیلئے عدالت نے ضروری دستاویزات فیکس کردئیے ہیں۔
ملحوظ رہے کہ رامپور میں دوسری مرحلے میں 14فروری کو ووٹنگ ہونی ہے ۔ اس کے لئے نامزدگی کی آخری تاریخ 28جنوری ہے ۔ ان کے خلاف درج مقدموں کی سماعت عدالت میں زیر التوا ہونے کی وجہ سے نامزدگی سے قبل اعظم کے جیل سے باہر آنے کی توقع کم ہے ۔اعظم خان کے خلاف تقریبا 100مقدمے چل رہے ہیں۔ ان میں سے دو مقدموں کو چھوڑ کر تقریبا سبھی میں ان کی ضمانت مل چکی ہے ۔