ماؤنٹ مونگانوئی۔ 27جنوری (سیاست ڈاٹ کام) ہندوستانی ٹیم، آسٹریلیا جو شکست دینے کے بعد اب اپنے فتح کے سلسلہ کو جاری رکھتے ہوئے پیر کے روز نیوزی لینڈ کو یہاں ہونے والے تیسرے ون ڈے میں بھی شکست دیکر پانچ میچوں کی سیریز میں 3-0 کی غیر مفتوح برتری بنانے کے ارادے سے اترے گی۔کپتان وراٹ کوہلی تیسرے ون ڈے میں ہی سیریز نمٹانا چاہیں گے کیونکہ انہیں سیریز کے آخری دو ون ڈے اور اس کے بعد تین میچوں کی ٹوئنٹی ۔20 سیریز میں آرام دیا گیا ہے ۔ ہندوستان نے پہلے دو میچوں میں میزبان ٹیم کو آسانی سے شکست دی تھی۔ہندوستان نے سیریز کا پہلا میچ نیپئر میں آٹھ وکٹ سے جیتا تھا جبکہ یہاں اس نے دوسرے ون ڈے میں 90 رنوں سے کامیابی حاصل کی۔ دونوں ہی میچوں میں میزبان ٹیم کی گیند بازی اور بلے بازی ناقص رہی جبکہ اس سیریز سے قبل نیوزی لینڈ نے سری لنکا کا ون ڈے سیریز میں 3-0 سے صفایا کیا تھا۔ہندوستانی کپتان تیسرے میچ میں بھی اسی ٹیم کے ساتھ اترنا چاہیں گے جس نے دوسرا میچ بڑی آسانی سے جیت لیا۔ یہ دیکھنا دلچسپ ہوگا کہ ٹیم مینجمنٹ الیون میں کوئی تبدیلی کرتا ہے یا نہیں۔ ابھی یہ بھی واضح نہیں ہے کہ آل راؤنڈر ہاردک پانڈیا کو آخری الیون میں موقع ملے گا یا نہیں۔بی سی سی آئی نے خواتین پر پانڈیا کے نامناسب تبصرہ کرنے کے معاملے میں عائد معطلی ختم کردی ہے تاکہ وہ نیوزی لینڈ میں ٹیم میں شامل ہو سکیں۔
پانڈیا کو اس معاملے کے بعد آسٹریلیا دورے سے واپس بھیج دیا گیا تھا۔ اگر ٹیم مینجمنٹ پانڈیا کو الیون میں شامل کرنے کا فیصلہ کرتا ہے تو آل راؤنڈر وجے شنکر کو باہر بیٹھنا پڑ سکتا ہے جنہیں اب تک خود کو ثابت کرنے کا پورا موقع نہیں مل پایا ہے ۔دوسرے ون ڈے میں ہندوستان نے روہت شرما (87) اور شکھر دھون (66) کی شاندار نصف سنچریوں اور ان کے درمیان 154 رنوں کی زبردست شراکت داری کے بعد چائنامین گیند باز کلدیپ یادو (45 رن پر چار وکٹ) کی بہترین کارکردگی کی بدولت نیوزی لینڈ کو 90 رنوں سے شکست دی تھی۔ اس مقابلے میں ہندوستان کے ٹاپ آرڈر کے سبھی بلے بازوں نے رن حاصل کئے تھے ۔روہت شرما 87، شیکھر دھون 66، وراٹ کوہلی 43، انباٹي رائیڈو 47، مہندر سنگھ دھونی ناٹ آؤٹ 48 اور کیدار جادھو ناٹ آؤٹ 22 کی شاندار کارکردگی سے ہندوستان نے چار وکٹ پر 324 رن کا مضبوط اسکور بنایا اور نیوزی لینڈ کو 40.2 اوور میں 234 رن پر نمٹا دیا۔ پہلے ون ڈے میں بھی نیوزی لینڈ کی ٹیم محض 157 رن پر ڈھیر ہو گئی تھی۔نیوزی لینڈ کو اگر ہندوستان کو چیلنج دینا ہے تو اسے اپنی بلے بازی کو بہتر کرنا ہوگا۔