اسلام آباد : وزیر اعظم شہباز شریف کا کہنا ہے کہ سابق حکومت نے چار سال تک ملکی وسائل برباد کئے، سیلاب متاثرین کی بحالی میں وقت لگے گا، بحالی راتوں رات ممکن نہیں۔ ڈیرہ اسماعیل خان میں سگو پل بحالی کے کام کا جائزہ لینے کے بعد گفتگو کرتے ہوئے شہباز شریف نے کہا کہ سیلاب متاثرین کی بحالی کیلئے تمام ادارے مل کر کام کر رہے ہیں۔انہوں نے کہا کہ دو ہفتوں میں ٹانک میں 100 گھروں پر مشتمل پہلے منصوبے کا افتتاح کریں گے۔ شہباز شریف کا کہنا ہے کہ وفاقی اور صوبائی ادارے عوام کی خدمت کیلئے کوشاں ہیں، سندھ میں ہر طرف پانی ہی پانی ہے، مصیبت کی گھڑی میں آپ کے ساتھ ہیں۔ان کا کہنا ہے کہ وفاقی مخلوط حکومت نے 28 ارب روپے سیلاب متاثرین کیلئے مختص کیے، 20 ارب بی آئی ایس پی کے تحت شفاف طریقے سے تقسیم کیے جاچکے ہیں، جبکہ 8 ارب روپے بھی جلد سیلاب متاثرین میں تقسیم کر دیں گے۔ سیلاب متاثرہ فی خاندان کو 25 ہزار روپے دے رہے ہیں، سیلاب سے جاں بحق افراد کے لواحقین کو دس لاکھ روپے معاوضہ دے رہے ہیں۔
