نئی دہلی : غیر قانونی طریقہ سے اپنے بچوں کے ساتھ ہندوستان میں داخل ہوئی پاکستانی خاتون سیما حیدر اور ان کے ہندوستانی شوہر سچن سے نوئیڈا میں واقع انسداد دہشت گردی اسکواڈ (اے ٹی ایس) کے دفتر میں گھنٹوں پوچھ تاچھ کی گئی۔ اس دوران تفتیشی ایجنسی نے اس کے پاسپورٹ، اس کے بچوں کے پاسپورٹ کے بارے میں معلومات حاصل کیں۔ سیما حیدر اور سچن کی پہلی ملاقات سے لے کر پب جی گروپ کے دیگر لڑکوں کے بارے میں بھی تفصیلات حاصل کی گئیں۔ سچن اور سیما 7 دنوں تک نیپال میں رہے، اس دوران وہ نیپال میں کہاں گئے اور کن لوگوں سے ملے، اس بارے میں بھی پوچھ تاچھ کی گئی۔سیما حیدر کے پورے خاندان سے متعلق معلومات حاصل کی گئیں، ان کے والدین اور بہن بھائیوں کے بارے میں بھی معلومات اکٹھی کی گئیں۔ سیما کا مقصد سچن کی محبت میں ہندوستان آنا تھا یا اس کے پیچھے کوئی اور وجہ ہے؟ سیما حیدر سے ان کے گاؤں صوبہ سندھ اور پھر کراچی میں رہنے کے بارے میں بھی معلومات حاصل کی گئیں، وہ صوبہ سندھ سے کب کراچی میں رہنے آئیں۔اس کے علاوہ سیما حیدر کے بچوں، سیما کے پلاٹ بیچنے کی کہانی اور اس کے سفری راستوں کے بارے میں معلومات لی گئیں۔ سیما حیدر سے اس ایجنٹ کے بارے میں بھی معلومات حاصل کی گئیں، جس نے سیما کو ہندوستان پہنچنے میں مدد کی۔ کیا سیما کی سرحد پر تلاشی لی گئی تھی، اس سے وابستہ سوالات بھی کئے گئے۔
سیما حیدر اپنے عاشق سچن کیساتھ نوئیڈا سے بھی فرار ہونے والی تھی : پولیس
نئی دہلی: پاکستانی خاتون سیما حیدر گرفتار ہونے سے پریشان تھی۔ وہ اپنے 4 بچوں اور عاشق سچن مینا کے ساتھ فرار ہونے کی کوشش میں تھی۔نوئیڈا پولیس نے منگل کو بتایا کہ سیما بغیر ویزا کے غیر قانونی طور پر ہندوستان آئی تھی اور اپنے عاشق سچن مینا کے ساتھ رہ رہی تھی۔ ان دونوں کی ملاقات 2019 میں ایک آن لائن گیم پب جی (PUBG) کھیلتے ہوئے ہوئی تھی۔ پولیس کا دعویٰ ہے کہ سیما حیدر نے گرفتاری سے بچنے کے لیے فرار ہونے کا منصوبہ بنایا تھا۔ سیما سے پیر کو اتر پردیش پولیس کے انسداد دہشت گردی دستہ نے پوچھ گچھ کی تھی۔نوئیڈا پولیس کی طرف سے درج کی گئی ایف آئی آر کے مطابق، سیما نے انہیں بتایا کہ جب انہیں ہندوستان کا ویزا نہیں مل سکا۔ چنانچہ وہ نیپال چلی گئی اور پھر وہاں سے نئی دہلی کے لیے بس سے چلی گئی۔ سیما نے بتایا کہ وہ 13 مئی کو اپنے 4 بچوں کے ساتھ یمنا ایکسپریس وے پہنچی، جہاں سچن کا انتظار تھا۔وہ ہمیں گریٹر نوئیڈا کے محلہ امبیڈکر نگر میں کرائے کے مکان میں لے گیا۔ غیر قانونی تارکین وطن کو پناہ دینے کے الزام میں گرفتار سچن مینا نے پولیس کو بتایا کہ اس نے سیما کو اپنے والد سے ملوایا اور اس سے شادی کرنے کے اپنے ارادے کے بارے میں بتایا تھا۔سیما کے بارے میں سچن کے والد نے کہا تھا کہ اگر وہ ہندوستانی طرز زندگی کو اپناتی ہیں تو وہ شادی کی اجازت دیں گے۔
سیما نے بھی اس سے اتفاق کیا۔ اس کے بعد سچن اپنے آبائی شہر چلا گیا اور کچھ دنوں کے بعد سچن کے والد ان کے گھر آئے اور اسے بلند شہر کی ایک عدالت میں لے گئے تاکہ کورٹ میرج کے لیے ایک وکیل سے ملوایا جائے۔جب سیما نے اسے اپنے کاغذات دکھائے تو وکیل نے سیما سے کہا کہ وہ سچن سے شادی نہیں کر سکتی کیونکہ سیما ہندوستانی شہری نہیں ہے۔وکیل سے ملنے کے فوراً بعد سیما اپنے بچوں کے ساتھ وہاں سے جانا چاہتی تھی۔ اسے معلوم تھا کہ وکیل پولیس کو اطلاع دے گا اور پولیس اسے گرفتار کر لے گی۔ سیما نے پولیس کو بتایا کہ ہم نے کرائے کا مکان فوری طور پر خالی کر دیا تھا اور دہلی جانا چاہتے تھے، ہم نے سچن کے والد سے رقم بھی ادھار لی تھی لیکن پولیس نے وہاں پہنچ کر ہمیں گرفتار کر لیا۔خیال رہے کہ کئی میڈیا گروپ نے سیما -سچن کو رشتے کو پیار کارشتہ بتا کر خوب واہ واہی بٹورنے میں کامیاب ہوئے ہیں۔