ترواننتا پورم: کیرالا میں منگل کو تقریباً ایک لاکھ کمیونسٹ پارٹی آف انڈیا۔مارکسسٹ (سی پی آئی۔ایم) کارکنان کے راج بھون کے سامنے زبردست احتجاجی مظاہرے میں حصہ لینے کا امکان ہے ۔یہ احتجاج گورنر عارف محمد خان کے خلاف ہے ، جو مختلف یونیورسٹیوں میں متعدد غیر قانونی تقرریوں پر پنارائی وجین کی قیادت والی بائیں بازو کی حکومت سے براہ راست جدوجہد کررہے ہیں۔پارٹی کے جنرل سکریٹری سیتارام یچوری ریاست میں تعلیم کے شعبے کو بھگوا بنانے کی کوشش کرنے پر گورنر کے خلاف احتجاجی مارچ شروع کریں گے ۔پارٹی ذرائع نے بتایا کہ یہ کیرالا کی تاریخ کا سب سے بڑا احتجاجی مارچ ہوگا۔ انہوں نے سپریم کورٹ کے حکم کے بعد نو یونیورسٹیوں کے وائس چانسلروں کو اپنے عہدے سے استعفیٰ دینے کے لئے کہا اوراس سلسلے میں کیرالا یونیورسٹی کے نئے وائس چانسلر کی تقرری کے ساتھ 15 سینیٹ ممبران کو برطرف کر دیا۔پارٹی کے کیرالا سکریٹری ایم وی گووندن، سی پی آئی (ایم) کے ریاستی سکریٹری کنم راجندرن، ڈی ایم کے ایم پی تروچی شیوا، ایل ڈی ایف کنوینر ای پی جے راجن، کیرالا کانگریس (ایم) کے رہنما جوس کے منی دیگر قائدین کے احتجاجی مارچ میں شامل ہونے کی توقع ہے ۔
