ریاض ۔ایک سعودی شہری نے عسیر علاقے میں اپنے مکان کو عجائب گھر میں تبدیل کردیا۔عسیر ریجن کے سعودی شہری علی الحجل نے باحہ الربیعہ قریے میں 160 برس پرانی حویلی کو عجائب گھر میں تبدیل کردیا۔ یہاں سیر وسیاحت کے لیے آنے والے عجائب گھر کثیر تعداد میں پہنچنے لگے۔ میڈیا سے گفتگو کرتے ہوئے علی الحجل نے کہا کہ الحجل عجائب گھر 14 ہزار نوادر سے آراستہ ہوچکا ہے۔ یہ میری 45 سالہ کاوشوں کا ثمر ہے۔ علی الحجل نے توجہ دلائی کہ نوادر23 کمروں میں سجائے گئے ہیں۔ شروع میں نوادرکی تعداد 50 تا 60 سے زیادہ نہیں تھی، رفتہ رفتہ بڑھتے چلے گئے اور اب ان کی تعداد 14 ہزار تک پہنچ گئی ہے۔ ہر قطعے کا تعارفی کارڈ بھی بنایا گیا ہے۔ علی الحجل نے مزید کہا کہ عجائب گھر دیکھنے کے لیے آنے والوں کے لیے عسیر کے عوامی کھانوں کے ریستوران بھی کھولے گئے ہیں۔ ایک طرف سیاح نوادر سے لطف اندوز ہوتے ہیں تو دوسری جانب مقامی طرز کے روایتی کھانے بڑے شوق سے کھاتے ہیں۔
