کراچی۔22 اپریل (سیاست ڈاٹ کام ) ورلڈ کپ سے قبل پاکستان کرکٹ ٹیم کو بڑا دھکا لگا ہے اور نوجوان لیگ اسپنر شاداب خان کے خطرناک وائرس کے شکار ہونے کا انکشاف ہوا ہے جس کے باعث وہ انگلینڈ کے خلاف ونڈے سیریز میں حصہ نہیں لے سکیں گے۔چیف سلیکٹر انضمام الحق نے میڈیا سے خصوصی گفتگو کرتے ہوئے کہاکہ شاداب خان کے خون ٹسٹ میں وائرس کی نشاندہی ہوئی ہے جس کے سبب ڈاکٹرز نے انہیں 4 ہفتے آرام کا مشورہ دیا ہے۔ انضمام نے کہا کہ لیگ اسپنر انگلینڈ کے خلاف ونڈے سیریز نہیں کھیل سکیں گے اور اْمید ہے کہ وہ ورلڈکپ تک فٹ ہو جائیں گے۔ ذرائع کے بموجب ہے کہ شاداب خان کی بلڈ رپورٹ درست نہیں آئی اور ان کے خون کے نمونے میں ہیپاٹائٹس کے وائرس کی موجودگی کا انکشاف ہوا ہے۔ بورڈ نے اس بات کی اطلاع ملتے ہیں شاداب کو ڈاکٹرز کے مشورے پر انگلینڈ کے خلاف سیریزنہ کھلانے کا فیصلہ کیا جبکہ ان کے مزید ٹسٹ کئے جا رہے ہیں۔ پاکستان کرکٹ بورڈ کی جانب سے چند دن قبل ورلڈکپ اور دورہ انگلینڈ کے لئے ٹیم کا اعلان کیا گیا تھا اورشاداب خان بھی اس ٹیم کا حصہ تھے۔ تاہم اب چند دن بعد ہی شاداب کے خطرناک امراض کا شکار ہونے کا انکشاف ہوا ہے جس کے سبب ان کی ورلڈکپ میں شرکت غیر یقینی ہوگئی ہے۔ پاکستانی ٹیم دورہ انگلینڈ اور ورلڈکپ کے لئے23 اپریل کو روانہ ہوںگے اورشاداب اس ٹیم کے ہمراہ نہیں جائیں گے۔ پی سی بی کے مطابق شاداب خان کا علاج انگلینڈ میں ہوگا اور انہیں ہر طرح کی سہولیات فراہم کی جائیں گے۔ پاکستان کرکٹ بورڈ نے شاداب خان کے متبادل کے طور پر یاسر شاہ کو انگلینڈ کے خلاف سیریزکا حصہ بنا لیا ہے۔
