کویت سٹی : کویت میں وزارت اوقاف نے بلاک ون کے علاقے الرحاب میں عبداللہ بن جعفر مسجد کے موذن کو معطل کرکے اس کے خلاف کارروائی شروع کی ہے، موذن پر الزام ہے کہ انہوں نے شارٹس پہن کر اذان دی ہے ۔ اوقاف کونسل کی طرف سے شائع کردہ ایک بیان میں کہا گیا ہیکہ مسجد عبداللہ بن جعفر کے موذن کو نامناسب لباس میں اذان دینے پر معطل کیا گیا ہے۔اس اذان کی ایک مختصر ویڈیو سوشل میڈیا بھی نشر کی گئی ہے جس میں موذن کو شارٹس پہن کر نماز کے لیے اذان دیتے ہوئے دکھایا گیا ہے جس کے بعد مسجد کے علاقے میں رہنے والے متعدد ٹوئٹر صارفین نے اس واقعہ کی تصدیق کی ہے۔ ایک صارف نے کہا کہ موذن مسجد کی صفائی اور اسٹور روم میں سامان ترتیب دے رہے تھے جس کیلئے اس نے نیکر نما لباس پہن رکھا تھا پھر اسی حالت میں اذان بھی دے ڈالی۔ ایک صارف نے کہا کہ موذن فجر کی نماز سے پہلے مسجد کی لائبریری اور کچھ کام میں مصروف تھے۔ وقت کم تھا جس کے لیے وہ کپڑے تبدیل نہیں کر سکے جس پر اسی حالت میں اذان دینی پڑی۔
