جنیوا: اقوام متحدہ کے محکمہ انسداد دہشت گردی کے سربراہ ولادیمیر ورونکوف نے مطالبہ کیا ہے کہ شام سے 27 ہزار بچوں کو محفوظ مقامات پر منتقل کرنے کے اقدامات کیے جائیں۔ورونکوف نے خبردار کیا ہے کہ جنگ زدہ شام میں معصوم بچوں کی زندگیوں کو شدید خطرات لاحق ہیں۔ بچوں کو ذہنی و نفسیاتی مسائل سے بچانے کی بھی ضرورت ہے۔ولادیمیر ورونکوف نے اقوام متحدہ کی سلامتی کونسل کے ایک غیر رسمی اجلاس سے خطاب میں مزید بتایا کہ شمال مشرقی شام میں ملک کے سب سے بڑے پناہ گزین کیمپ الحول میں اس وقت 62 ہزار سے زائد افراد پناہ لیے ہوئے ہیں جن میں 27 ہزار نابالغ بچے ہیں۔انہوںنے کہا کہ ان بچوں میں زیادہ تر داعش اور دیگر جنگجوؤں کے بچے ہیں۔ اگر انہیں بہتر ماحول میسر نہیں ہوا تو یہ جنگجو گروپوں کے چنگل میں پھنس سکتے ہیں۔