دمشق 8 مارچ (سیاست ڈاٹ کام) جنگ زدہ ملک شام میں ایک بڑے ٹریفک حادثے میں کم از کم 32افراد کے ہلاک ہونے کی تصدیق کر دی گئی ہے۔ یہ حادثہ اْس وقت پیش آیا جب ایک آئل ٹینکر دو بسوں سے ٹکرانے کے بعد کئی دوسری موٹر گاڑیوں کو روندتا چلا گیا۔ حادثے کی وجہ تیل سے بھرے ٹینکر کی بریکوں کا فیل ہونا بتایا گیا ہے۔ جن کاروں کو اس ٹینکر نے روند ڈالا، اْن کی تعداد پندرہ ہے۔ شامی وزارت داخلہ کے مطابق ستتر افراد زخمی ہیں اور ان میں بعض کی حالت تشویناک ہے۔ اس باعث ہلاکتوں میں اضافے کا خدشہ ظاہر کیا گیا ہے۔ ہلاک ہونے والوں میں زیادہ تر عراقی شیعہ زائرین تھے۔ دمشق شہر کے نواح میں حادثہ اْس سڑک پر ہوا جو دارالحکومت کو حمص سے ملاتی ہے۔
