ممبئی ۔12 ڈسمبر (سیاست ڈاٹ کام ) ویسٹ انڈیز کے خلاف شاندار بیٹنگ کا مظاہرہ کرنے والے ہندوستانی کپتان ویراٹ کوہلی نے خوشی کا اظہار کیا ہے جیسا کہ ہندوستان اورویسٹ انڈیزکے درمیان تین میچوں کی ٹی 20 سیریزکے آخری اورتیسرے میچ میں ہندوستانی ٹیم نے ویسٹ انڈیز کو شکست دے کرسیریزپرقبضہ کرلیا ہے۔ 241 رنوں کے ہدف کو ویسٹ انڈیزکی ٹیم حاصل کرنے میں ناکام رہی اور20 اوورمیں 8 وکٹ کے نقصان پر صرف 173 رن بناسکی۔ ہندوستان نے 67 رنوں سے شاندارجیت حاصل کی اورسیریزاپنے نام کرلیا۔ ویسٹ انڈیز کی طرف سے کیرون پولارڈ نے نصف سنچری بنائی۔ انہوں نے 39 گیندوں پر68 رنوں کی اننگز کھیلی جبکہ ہیٹ مائرنے 41 رن بنائے۔ ہندوستان کے محمد سمیع، کلدیپ یادو، دیپک چہر اوربھونیشور کمار نے فی کس دو وکٹ حاصل کئے۔ اس سے قبل ویسٹ انڈیزکیخلاف فیصلہ کن تیسرے ٹی 20 میچ میں ہندوستانی بیٹسمینوں نے طوفانی اننگز کھیلی اور 20 اوورمیں تین وکٹ کے نقصان پر 240 رنز بنائے اور ویسٹ انڈیزکو 241 رنوں کا بڑا ہدف دیا تھا۔ کے ایل راہول سنچری بنانے سے محروم رہ گئے۔ راہول نے شاندار91 رنز کی اننگز کھیلی۔اننگز میں 56 گیندوں کا سامنا کیا 9 چوکے اور4 چھکے لگائے۔ کپتان وراٹ کوہلی نے شانداربیٹنگ کرتے ہوئے صرف 29 گیندوں پر70رنز بناڈالے۔ وہ آخرتک آؤٹ نہیں ہوئے۔
کپتان کوہلی نے محض 21 گیندوں میں اپنی نصف سنچری مکمل کی۔کوہلی نے اپنی اننگز میں 7 چھکے اور4 چوکے لگائے۔
