دبئی : پاکستان کرکٹ ٹیم کے سابق کپتان شاہد آفریدی کی سابق وزیر اعظم پاکستان و کرکٹر عمران خان کے بیٹے قاسم خان کے ساتھ دبئی میں ملاقات ہوئی ہے۔ شاہد آفریدی اور قاسم خان کی یہ تصویر دبئی انٹرنیشنل اسٹیڈیم میں گزشتہ روز منعقدہ پاکستان بمقابلہ بھارت میچ کے دوران لی گئی۔ شاہد آفریدی اور قاسم خان کی تصویر دیکھتے ہی دیکھتے وائرل ہو گئی جسے متعدد سوشل میڈیا پیجز کی جانب سے بڑے پیمانے پر ری شیئر کیا جا رہا ہے۔ تصویر میں بانی پاکستان تحریک انصاف کے ناقدین میں شمار ہونے والے شاہد آفریدی نے ان کے بیٹے کے کندھے پر ہاتھ رکھا ہوا ہے اور دونوں خوش گوار موڈ میں نظر آرہے ہیں۔ عمران خان ان دنوں مختلف مقدمات کے سبب جیل میں بند ہیں۔ ان کی پارٹی پی ٹی آئی ان کی رہائی کیلئے قانونی جدوجہد کررہی ہے لیکن وزیر اعظم شہباز شریف کی مخلوط حکومت سے اسے مزاحمت کا سامنا ہے۔
