کراچی ۔پاکستان کرکٹ ٹیم کے سابق کپتان اور اسٹار آل راونڈر شاہد آفریدی نے کہا ہے کہ موجودہ ٹیم میں شامل فاسٹ بولر شاہین شاہ اور نسیم شاہ میں بہترین بولر بننے کی صلاحیت موجود ہے۔سماجی رابطے کی ویب سائٹ پر شاہد آفریدی نے مداحوں کے متعدد سوالوں کے جواب دیئے۔آفریدی سے ان کے چاہنے والوں نے ماضی کی اور موجودہ کرکٹ سے متعلق سوالات پوچھے۔فاسٹ بولر جنید خان سے متعلق سوال پر جواب دیتے ہوئے آفریدی نے کہا کہ جنید خان کو مزید مواقع ملنے چاہئیں۔ایک سوال کے جواب میں آفریدی نے کہا کہ انہیں سعید انور کے ساتھ بیٹنگ کرنے میں بیحد مزہ آتا تھا۔جارحانہ بیٹنگ کرنے والے کھلاڑیوں سے متعلق سوال پر شاہد آفریدی نے کہا کہ آسٹریلیا کے میکسویل اور ایرن فنچ ان کے پسندیدہ کھلاڑی ہیں۔ایک مزید سوال پر آفریدی نے کہا کہ موجودہ دور میں ان کے پسندیدہ آل راونڈر انگلینڈ کے کھلاڑی بین اسٹوکس ہیں جبکہ آسٹریلیا کے فاسٹ بولر پیٹ کمنز دنیا کے بہترین بولر ہیں۔آفریدی سے پوچھا گیا کہ انہیں کون سے ہندوستانی بیٹسمین پسند ہیں جس پر آفریدی نے کوہلی اور روہت شرما کا انتخاب کیا۔
آفریدی نے عبدالقادر کو پسندیدہ اسپن بولر بھی قرار دیا۔