نئی دہلی۔ 4 فبروری (سیاست ڈاٹ کام) سپریم کورٹ نے قومی دارالحکومت کے شاہین باغ میں دھرنا و مظاہرہ کو ہٹانے سے متعلق درخواست کی فوری سماعت کی اپیل کے سلسلہ میں مینشنگ رجسٹرار کے پاس جانے کی درخواست گزار کو منگل کو ہدایت دی۔ درخواست گزار نند کشور گرگ کی جانب سے چیف جسٹس شرد اروند بوبڈے کی صدارت والی بنچ کے سامنے درخواست کا خاص طور سے ذکر کیا گیا اور فوری سماعت کی درخواست کی گئی، لیکن عدالت عظمیٰ نے کہا کہ وہ اس کے لئے مینشنگ رجسٹرار کے پاس جائیں۔عرضی میں مطالبہ کیا گیا ہے کہ شاہین باغ میں جاری دھرنا و مظاہرہ کو ہٹایا جائے تاکہ یالندی کنج ۔شاہین باغ کا راستہ پھر سے کھل سکے۔ اس کے لئے عدالت مرکزی حکومت اور متعلقہ محکمہ کو حکم دے۔ پٹیشن میں یہ بھی مطالبہ کیا گیا ہے کہ عوامی مقامات پر دھرنا و مظاہرہ پر پابندی عائد کرنے کے لئے عدالت مرکزی حکومت کو ہدایات جاری کرنے کا حکم دے۔یالندی کنج۔شاہین باغ راستہ بند ہونے سے مسافروں کو ہونے والی دقتوں کا حوالہ دیتے ہوئے درخواست میں کہا گیا ہے کہ لوگ ڈی این ڈی فلائی اوور اور آشرم جیسے متبادل راستوں سے سفر کرنے پر مجبور ہیں، جس کی وجہ سے مسافروں کا قیمتی وقت اور ایندھن کی بربادی ہو رہی ہے۔
