نئی دہلی ،یکم فروری (سیاست ڈاٹ کام)مرکزی وزیرقانون روی شنکر پرساد نے ہفتہ کو کہاکہ شہریت (ترمیمی )قانون (سی اے اے )کے خلاف دہلی کے شاہین باغ میں مظاہرہ کررہے لوگوں کے شکوک وشبہات دورکرنے کیلئے حکومت ’’منظم طریقہ‘‘ سے بات چیت کرنے کیلئے تیار ہے۔ پرساد نے ٹوئیٹ کیا کہ نریندرمودی حکومت سی اے اے کے خلاف مظاہرہ کررہے لوگوں کے سبھی شکوک وشبہات دورکرنے کیلئے بات چیت کرنے کوتیار ہے ۔ انھوں نے کہاکہ حکومت شاہین باغ کے مظاہرین کے ساتھ بات چیت کرنے کیلئے یتارہیں لیکن بات چیت منظم طریقہ سے ہونی چاہئے ۔ انھوں نے اس دوران اپنے ٹوئیٹ میں ایک ٹی وی مباحثہ کا لنک مشترک کیا جس میں مظاہرہ کرنے والے ایک شخص نے یہ سوال کیاتھا کہ حکومت مظاہرین سے بات چیت کرنے کی کوشش نہیں کررہی ہے ۔ پرساد کایہ بیان اس وقت آیا ہے جب قومی جمہوری اتحاد (این ڈی اے )میں شامل شرومنی اکالی دل ،جنتادل یونائٹیڈ اور لوک جن شکتی پارٹی نے اس مسئلہ پر بی جے پی کے سامنے ناراضگی ظاہر کی تھی ۔ واضح رہے کہ سی اے اے قانون میں افغانستان ،پاکستان اور بنگلہ دیش میں مذہب کی بنیاد پر ظلم وزیادتی کی شکار اقلیتوں یعنی ہندو،بودھ،جین،پارسی اور عیسائی فرقہ سے تعلق رکھنے والے لوگوں کو ہندستان کی شہریت دینے کا التزام ہے۔ اس قانون کے تحت 31دسمبر 2014سے پہلے ہندستان آئے ان لوگوں کو ہندستان کی شہریت دی جائے گی۔
شاہین باغ میں دہشت گردی کے حامی جمع : یوگی
دریں اثناء چیف منسٹر اترپردیش یوگی آدتیہ ناتھ نے الزام عائد کیا کہ وہ جو کشمیر میں دہشت گردوں کی حمایت کرتے ہیں، وہی لوگ شاہین باغ میں احتجاج منظم کررہے ہیں اور ’آزادی‘ کے نعرے لگا رہے ہیں۔ شمال مغربی دہلی کے روہنی میں انتخابی ریلی سے خطاب کرتے ہوئے یوگی نے عآپ حکومت پر نکتہ چینی کی اور کہا کہ اروند کجریوال حکومت شاہین باغ میں احتجاجیوں کو بریانی سربراہ کررہی ہے۔سینکڑوں خواتین و دیگر افراد 15 ڈسمبر سے احتجاج پر ہیں۔