کراچی ۔7 فروری (سیاست ڈاٹ کام ) راولپنڈی ٹسٹ میںبولروں کی شاندار بولنگ کی بدولت پاکستان نے بنگلہ دیش کو پہلی اننگز میں 233 رنز پر آؤٹ کردیا۔ راولپنڈی میں کھیلے جارہے دو ٹسٹ میچوں کی سیریز پر مشتمل پہلے ٹسٹ میچ کا ٹاس پاکستانی ٹیم کے کپتان اظہر علی نے جیت کر پہلے بنگلہ دیش کو بیٹنگ کی دعوت دی۔ تمیم اقبال اور سیف حسن نے اننگز کا آغاز کیا جو زیادہ اچھا نہیں رہا، شاہین آفریدی نے پہلے ہی اوور میں سیف کو کھاتہ کھولے بغیر ہی پویلین واپس بھیج دیا جب کہ اگلے ہی اوور میں تمیم اقبال بھی صرف 3 رنز پر محمد عباس کا شکار بن گئے۔ بنگلہ دیشی کپتان مومن الحق بھی بڑی اننگز کھیلنے میں ناکام رہے اور پہلے ہی سیشن میں شاہین آفریدی کے ہاتھوں 30 رنز پر پویلین واپس لوٹ گئے، نجم الحسین کی کوششیں بھی 44 رنز تک محدود رہی۔ محمود اللہ بھی 25 رنز کے مہمان ثابت ہوئے۔ محمد متھن بنگلہ دیش کی جانب سے نصف سنچری اسکور کرنے والے واحد بیٹسمین بنے، وہ 63 رنز کی اننگز کھیل کر آؤٹ ہوئے۔ لٹن داس 33 رنز پر آؤٹ ہوئے۔ میزبان ٹیم کی جانب سے شاہین آفریدی نے 4 وکٹ لئے اور کامیاب بولر ثابت ہوئے جبکہ محمد عباس اور حارث سہیل نے فی کس 2 وکٹیں حاصل کیں۔علاوہ ازیں نوجوان فاسٹ بولر نسیم شاہ کے نام ایک وکٹ رہی ۔ پاکستان کی جانب سے سری لنکا کے خلاف کراچی ٹسٹ ٹیم کو برقرار رکھا گیا ہے۔
اور ڈومیسٹک کی کارکردگی کی بنیاد پر ٹیم میں شامل کیے جانے والے مڈل آرڈر فواد عالم کو ایک بار پھر نظرانداز کردیا گیا۔
