ممبئی، 2 اگست (ایجنسیز) بالی ووڈ کے ’بادشاہ‘ اور تین دہائیوں سے زائد عرصے تک فلمی دنیا پر راج کرنے والے شاہ رخ خان کو آخرکار اُن کی اداکاری کا سب سے بڑا قومی اعزاز ’’نیشنل فلم ایوارڈ‘‘ مل گیا ہے۔ شاہ رخ خان نے 1992 میں فلم ’دیوانہ‘ سے بالی ووڈ میں قدم رکھا تھا۔ جلد ہی ان کا شمار ہندوستان کے مقبول اداکاروں میں ہونے لگا۔ ’دل والے دلہنیا لے جائیں گے‘، ’چک دے انڈیا‘، ’کچھ کچھ ہوتا ہے‘ اور دیگر بلاک بسٹر فلموں میں ان کی جاندار اداکاری نے مداحوں کو گرویدہ بنائے رکھا۔ اگرچہ انہیں کئی بین الاقوامی اعزازات اور فلمی ایوارڈز ملے، لیکن ہندوستان کے سب سے بڑے فلمی اعزاز ’نیشنل ایوارڈ‘ سے وہ اب تک محروم تھے۔ مگر اب یہ انتظار ختم ہوچکا ہے۔ شاہ رخ خان کو 2023 کی فلم ’جوان‘ میں بہترین اداکاری پر نیشنل فلم ایوارڈ سے نوازا گیا ہے۔ یہ اعلان 71ویں نیشنل فلم ایوارڈز کے موقع پر یکم؍ اگست کو کیا گیا۔ دلچسپ بات یہ ہے کہ شاہ رخ خان کو یہ ایوارڈ وکرانت میسی کے ساتھ مشترکہ طور پر دیا گیا ہے، جنہوں نے فلم ’بارہویں فیل‘ میں بے مثال اداکاری کا مظاہرہ کیا تھا۔ معروف اداکارہ رانی مکھرجی کو بھی فلم ’مسز چٹرجی‘ میں بہترین اداکاری پر نیشنل ایوارڈ دیا گیا۔ یہ ایوارڈز صدرجمہوریہ ہند ایک تقریب میں عطا کریں گی، جس کا متعاقب اعلان کیا جائے گا۔ رانی کو بھی یہ اعزاز پہلی بار حاصل ہوا ہے۔ شاہ رخ خان نے اس اعزاز کے اعلان پر انسٹاگرام پر ایک ویڈیو شیئر کی، جس میں انہوں نے حکومت ہند اور اپنے مداحوں کا دل سے شکریہ ادا کیا۔ ویڈیو میں ان کے چہرے پر خوشی اور فخر صاف دکھائی دے رہا تھا۔ فلم جوان میں شاہ رخ نے ڈبل رول ادا کیا تھا، اور فلم میں وہ سات مختلف روپ اختیار کرتے نظر آئے، جو اُن کی فنی مہارت کا ثبوت ہے۔ 33 سال کے طویل انتظار کے بعد یہ ایوارڈ نہ صرف شاہ رخ خان کیلئے اعزاز ہے بلکہ اُن تمام مداحوں کیلئے بھی خوشی کی خبر ہے، جو برسوں سے اس لمحے کے منتظر تھے۔
