ممبئی، 10 مئی (ایجنسیز) شاہ رخ خان کے کریئر کے آغاز والی فلم ’’دیوانہ‘‘ کے پروڈیوسر گڈو دھنوا نے تصدیق کی ہے کہ ’’دیوانہ 2‘‘ پر کام جاری ہے۔ انہوں نے فلم ’’بچھو‘‘ کے سیکوئل کی بھی تصدیق کی ہے جس میں بابی دیول اور رانی مکھرجی نے کلیدی کردار نبھائے تھے۔ شاہ رخ خان نے ٹی وی سے پردہ سیمیں پر آنے کے بعد سب سے پہلے عزیز مرزا کی فلم ’’راجو بن گیا جنٹل مین‘‘ سائن کی تھی۔ راجکمارکی فلم ’’دیوانہ‘‘ شاہ رخ خان کے کریئر کی پہلی کامیاب فلم تھی۔ اس فلم میں رشی کپور اور دیویا بھارتی نے بھی اداکاری کی تھی اور یہ باکس آفس پر کامیاب ثابت ہوئی تھی۔ اس وقت یہ سب سے زیادہ کاروبار کرنے والی سال کی دوسری فلم ثابت ہوئی تھی۔ اس فلم کے ذریعہ ہی شاہ رخ خان کی شہرت کا آغاز ہوا تھا۔ 34سال بعد فلمساز گڈو دھنوا نے فلم کے سیکوئل کی تصدیق کی ہے۔ گڈو دھنوا نے کہا کہ جی ہاں! ’دیوانہ2‘ بنائی جارہی ہے۔ فی الحال ہم فلم کی اسکرپٹ پر کام کر رہے ہیں۔ فلم کی شوٹنگ کچھ وقت کے بعد شروع ہوگی کیونکہ اس سے پہلے میری ویب سیریز ریلیز ہوگی۔ انہوں نے مزید کہا کہ فلم کی کاسٹ طے کر لی گئی ہے۔ یہ واضح کر دینا چاہئے کہ ابھی یہ طے نہیں کہ شاہ رخ خان بھی فلم میں اداکاری کریں گے یا نہیں۔ دھنوا کے مطابق نہ صرف یہ کہ فلم’ دیوانہ‘ بلکہ ’بچھو‘ کا بھی سیکوئل بنایا جائے گا جس میں بابی دیول اور رانی مکھرجی نے اداکاری کی تھی۔ انہوں نے ’’بچھو‘‘ کے سیکوئل کے تعلق سے کہا کہ میری فلم ’’بچھو‘‘ کو کافی محبت ملی تھی۔ہم ’’بچھو 2‘‘ کے متعلق سوچ رہے ہیں اور اس کی اسکرپٹ پر بھی کام جاری ہے۔ شاہ رخ خان کے علاوہ دلجیت دوسانجھ کو بطور اداکارلانچ کرنے کا سہرا بھی گڈو دھنوا کے سربندھتا ہے جو پنجابی فلموں میںکام کر رہے ہیں۔ انہوں نے شاہ رخ خان کی تعریف کرتے ہوئے کہا کہ بطور اداکاران کا ارتقاء اور ترقی غیر معمولی ہے۔ بلاشبہ نہ صرف یہ کہ وہ ایک بہترین اداکار ہیںلیکن ان کے متعلق خاص بات یہ ہے کہ وہ ایک محبت کرنے والے انسان ہیں۔ مجھے یقین ہے کہ ان کی یہی خوبی انہیں کامیابی کی مزید سیڑھیاں چڑھنے میں مدد فراہم کرے گی۔
