ممبئی : بالی ووڈ سوپر اسٹارشاہ رخ خان کے لیے کئی سوپر ہٹ گیت گانے والے بالی ووڈ کے مشہور گلوکار ابھجیت بھٹاچاریہ نے اپنے اور شاہ رخ کے درمیان کشیدگی کی اصل وجہ بیان کر دی ہے۔ 90 کی دہائی کے آخر میں ابھجیت اور شاہ رخ کے تعلقات خراب ہو گئے تھے۔ ایک حالیہ انٹرویو میں جب گلوکار سے پوچھا گیا کہ انہوں نے شاہ رخ کیلئے گانا کیوں چھوڑا؟ تو انہوں نے انکشاف کیا کہ جب کسی کی عزت نفس مجروح ہوتی ہے تو وہ فیصلہ کرلیتا ہے کہ اب بس بہت ہو گیا۔ ابھجیت نے کہا کہ وہ شاہ رخ خان کیلئے نہیں بلکہ اپنے کام کیلئے گاتے تھے۔ تاہم جب انہیں محسوس ہوا کہ ان کے کام کا کریڈٹ نہیں دیا جا رہا، جبکہ فلم کے سٹ پر چائے دینے والے کو بھی سراہا جا رہا ہے، تو انہیں لگا کہ ان کی محنت کی قدر نہیں کی جا رہی ہے۔ اس لیے انہوں نے فیصلہ کیا کہ وہ شاہ رخ کی آواز نہیں بنیں گے۔ جب ان سے سوال کیا گیا کہ آیا شاہ رخ نے دوبارہ ان سے رابطہ کیا، ابھجیت نے جواب دیا کہ ان سے رشتہ بالکل ختم نہیں ہوا لیکن شاہ رخ اب بڑے اسٹار ہیں اور شاید انہیں خود بھی اندازہ نہیں کہ وہ کہاں پہنچ چکے ہیں۔ انہوں نے کہا کہ وہ شاہ رخ سے کسی توقع کے بغیر اپنی زندگی میں آگے بڑھ رہے ہیں۔ابھجیت نے یہ بھی کہا کہ وہ عمر میں شاہ رخ خان سے 5 یا 6 سال بڑے ہیں اور دونوں میں اَنا موجود ہے۔ دونوں کی سالگرہ میں محض ایک دن کا فرق ہے۔ انہوں نے کہا کہ انہیں شاہ رخ کے سہارے کی ضرورت نہیں اور وہ اپنی راہ پر چل رہے ہیں۔ ابھجیت نے شاہ رخ خان کیلئے کئی مشہور گانے گائے، جن میں توبہ تمہارے یہ اشارے، فلم چلتے چلتے کا ٹائٹل ٹریک، وہ لڑکی جو سب سے حسین ہے، ذرا سا جھوم لوں میں، ہم تو دیوانے ہوئے یار اور تمہیں جو میں نے دیکھا شامل ہیں جو سوپر ہٹ ہوئے۔
