بغاوت کی کوشش کے بعد سرکاری نیوز ایجنسی نے سعودی فرمانروا کی تصاویر جاری کی
ریاض ۔ /8 مارچ (سیاست ڈاٹ کام) سعودی عرب کے فرمانروا شاہ سلمان صحت مند اور چاق و چوبند ہیں ۔ سعودی عرب میں شاہی خاندان کے خلاف بغاوت کی کوشش کو ناکام بنانے کے بعد یہ قیاس کیا جارہا تھا کہ شاہ سلمان علیل ہیں اور وہ سرکاری کام کاج سے دور ہیں ۔ سعودی نیوز ایجنسی نے شاہ سلمان کی تصویر جاری کرتے ہوئے بتایا کہ کل 3 شہزادوں کی جانب سے جن میں ان کے بھائی اور بھتیجے شامل تھے بغاوت کا مبینہ منصوبہ بنایا تھا ۔ اس منصوبہ کو پولیس نے ناکام بنادیا ۔ سعودی شاہی گارڈس نے بغاوت کرنے والے تینوں کو حراست میں لیا ہے ۔ بغاوت کو کچلنے میں کامیابی کے بعد ولیعہد شہزادہ محمد بن سلمان کی اقتدار پر گرفت مزید مضبوط ہوگئی ہے ۔ 84 سالہ شاہ سلمان کی صحت کے بارے میں قیاس آرائیاں کی جارہی تھیں اور کہا جارہا تھا کہ آیا سعودی عرب پر محمد بن سلمان کا کنٹرول ہوگا ۔ عالم عرب کے سب سے طاقتور حکمراں کے طور پر انہیں دیکھا جارہا ہے ۔ لیکن سرکاری سعودی پریس ایجنسی نے شاہ سلمان کی تصاویر پوسٹ کرتے ہوئے بتایا کہ وہ یوکرین اور اروگیو کے نئے سفیروں متعینہ سعودی عرب کو حلف دلارہے ہیں ۔ سعودی قیادت کے قریبی ذرائع نے کہا کہ شاہ سلمان صحت مند اور چاق و چوبند ہیں ۔ شاہی خاندان کے اندر ڈسپلن کو برقرار رکھنے کیلئے شہزادوں کو گرفتار کرلیا گیا ہے ۔ بغاوت کی سازش کرنے والے ولیعہد شہزادہ اب شاہی گارڈز کے قبضے میں ہے ۔ پرنس احمد بن عبدالعزیز السعود شاہ سلمان کے بھائی ہیں اور ان کے بھتیجہ پرنس محمد بن نائف کو بھی بغاوت کی سازش کرنے کے الزام میں گرفتار کیا گیا ہے ۔ اس بغاوت کا مقصد ولیعہد شہزادہ کو شاہ سلمان کا جانشین ہونے سے روکنا تھا ۔ پرنس نائف کے چھوٹے بھائی پرنس نواف بن نائف کو بھی گرفتار کیا گیا ہے ۔ شہزادہ محمد نے بغاوت کو کچلنے کیلئے تیزی سے کارروائی کی ہے ۔ شاہ سلمان کے فرزند کے طور پر محمد بن سلمان کو سعودی اقتدار پر مضبوط گرفت ہے ۔ انہوں نے اب تک سعودی عرب کے کئی اہم علماء اور مذہبی قائدین کے علاوہ شہزادوں اور تاجروں کو جیل میں ڈال دیا ہے ۔ وہ قائم مقام سعودی حکمراں سمجھے جاتے ہیں جو حکومت کے تمام اہم شعبوں پر کنٹرول کرتے ہیں ۔