نئی دہلی: انفورسمنٹ ڈائریکٹوریٹ نے دہلی کی شراب پالیسی سے متعلق منی لانڈرنگ کیس میں وزیر اعلی اروند کجریوال کو 21 دسمبر کو طلب کیا ہے۔ ای ڈی نے انہیں پہلے 2 نومبر کو طلب کیا تھا لیکن انہوں نے نوٹس کو غیر قانونی قرار دیتے ہوئے اسے واپس لینے کا مطالبہ کیا۔ کجریوال نے اسی دن مدھیہ پردیش اسمبلی انتخابات کے حوالے سے روڈ شو میں حصہ لیا تھا۔ پیر کو حکام نے بتایا کہ سی ایم کجریوال کو دہلی ایکسائز ڈیوٹی پالیسی کیس میں پوچھ گچھ اور ان کا بیان ریکارڈ کرنے کے لیے طلب کیا جا رہا ہے۔ انہوں نے کہا کہ انہیں 21 دسمبر کو ای ڈی ہیڈکوارٹر میں طلب کیا گیا ہے۔ یہ پیشرفت ایسے وقت میں سامنے آئی ہے جب کچھ دن پہلے دہلی حکومت کے افسران نے کہا تھا کہ سی ایم کجریوال 19 دسمبر سے تقریباً 10 دن کے لیے ’ویپشینا‘ کے لیے جا رہے ہیں۔ جب کجریوال کو ای ڈی کی طرف سے پہلا سمن موصول ہوا تو پارٹی نے کہا تھا کہ ’’بی جے پی انڈیا اتحاد کے اہم قائدین کو نشانہ بنا رہی ہے اور کجریوال کو گرفتار کیا جا سکتا ہے۔‘‘یاد رہے کہ تلنگانہ کی سابق حکومت بی آر ایس کی رکن پارلیمنٹ کے کویتا بھی شراب پالیسی معاملہ میں مبینہ طور پر ملوث ہیں۔
