کراچی ۔8 اگسٹ (سیاست ڈاٹ کام ) پاکستان کرکٹ بورڈ (پی سی بی) نے سیزن 20-2019 کے لئے سینٹرل کنٹریکٹ کا اعلان کردیا ۔گزشتہ سال 33 کھلاڑیوں کو سینٹرل کنٹریکٹ دیئے گئے تھے، تاہم نئے سیزن کے لیے 19 کھلاڑیوں کو کنٹریکٹ جاری کیا گیا ہے جس میں شامل کھلاڑیوں کے معاوضوں میں نمایاں اضافہ کیا گیا ہے۔سنٹرل کنٹریکٹ کی اے زمرے میں کپتان سرفراز احمد، بابر اعظم اور یاسر شاہ شامل ہیں۔ بی زمرے میں اسد شفیق، اظہر علی، حارث سہیل، امام الحق، محمد عباس، شاداب خان، شاہین شاہ آفریدی اور وہاب ریاض شامل ہیں۔ سی زمرے میں عابد علی، حسن علی، فخر زمان، عماد وسیم، محمد عامر، محمد رضوان، شان مسعود اور عثمان شنواری شامل ہوں گے۔ نیا سینٹرل کنٹریکٹ یکم جولائی 2019 تا 30 جون 2020 نافذالعمل ہوگا۔ پی سی بی کے بیان میں کہا گیا کہ گزشتہ 12 ماہ میں کھلاڑیوں کی فٹنس، کارکردگی اور آئندہ سیزن میں ٹیم کی نمائندگی کو مدنظر رکھتے ہوئے نیا سینٹرل کنٹریکٹ جاری کیا گیا ہے۔ محمد حفیظ اور شعیب ملک کو سینٹرل کنٹریکٹ جاری نہیں کیا گیا لیکن دونوں کھلاڑی کرکٹ ٹیم کے انتخاب کے لیے دستیاب ہوں گے۔ نئے کنٹریکٹ کے حوالے سے پی سی بی کے منیجنگ ڈائریکٹر (ایم ڈی) وسیم خان نے کہا کہ بورڈ نے آئندہ سیزن کے لیے بلند اہداف رکھے ہیں اور ہم نے سنٹرل کنٹریکٹ کے حصول کے لیے معیار بلند کیا ہے۔
