لاہور۔ 24 جنوری (سیاست ڈاٹ کام ) پاکستان نے پہلے ٹی ٹوئنٹی میچ میں شیعب ملک کی ذمہ دارنہ نصف سنچری کی بدولت بنگلہ دیش کو 5 وکٹ سے شکست دیکر سیریز میں 0-1 کی برتری حاصل کرلی۔ لاہور کے قذافی اسٹیڈیم میں کھیلے گئے پہلے ٹی ٹوئنٹی میچ میں بنگلادیش کے کپتان محموداللہ نے پاکستان کے خلاف ٹاس جیت کر پہلے خود بیٹنگ کرنے کا فیصلہ کیا اور مقررہ 20 اوورز میں 5 وکٹ کے نقصان پر 141 رنز بنائے جب کہ پاکستان نے مطلوبہ ہدف 5 وکٹ کے نقصان پر پورا کیا۔ ہدف کے تعاقب میں بابراعظم اور احسان علی نے اننگز کا آغاز کیا تاہم کپتان پہلے ہی اوور کی دوسری گیند پر کھاتہ کھولے بغیر پویلین واپس لوٹ گئے۔شعیب ملک اور احسان علی نے ذمہ دارانہ بیٹنگ کا مظاہرہ کیا، احسان 36 رنز بناکرآؤٹ ہوئے، افتخار احمد 16 کے مہمان ثابت ہوئے اور عماد وسیم 6 رنز پر بولڈ ہوئے تاہم شعیب ملک نے ذمہ داری کا مظاہرہ کرتے ہوئے نصف سنچری اسکور کرکے ٹیم کی جیت میں اہم کردار ادا کیا، وہ 58 رنز پر ناٹ آؤٹ رہے۔ پاکستان کیلئے شاداب خان، حارث رؤف اور شاہین شاہ آفریدی نے فی کس ایک وکٹ حاصل کی۔