اورنگ آباد : اورنگ آباد ضلع میں کوویڈ-19 سے فوت ہونے والوں کی شرح فیصد میں نمایاں کمی واقع ہوئی ہے ، نیز کورونا وائرس کو شکست دے کر روبہ صحت ہونے کی شرح میں خاطرخواہ اضافہ ہوا ہے ۔اسی طرح کوویڈ-19 سے متاثر ہو کر اسپتالوں میں داخل ہونے کی شرح بھی دن بدن کم ہورہی ہے ، اور یہ سب ضلعی انتظامیہ، محکمہ صحت و پولیس اور عوام کے تعاون اور مشترکہ کوشیشوں کی بدولت ممکن ہوا ہے ، جس کے لیے سب قابل مبارک باد ہیں، اس طرح کا اظہار خیال ریاستی وزیر برائے طبی تعلیم امیت دیشمکھ نے کیا۔ضلع کلکٹر آفس میں کورونا وائرس پر قابو پانے کے لیے کی جا رہی کوشیشوں کے ضمن میں ایک جائزہ میٹنگ میں شرکت کے بعد منعقدہ ایک پریس کانفرنس سے خطاب کرتے ہوئے امیت دیشمکھ نے بتایا کہ، اورنگ آباد شہر اور ضلع میں کورونا وائرس سے متاثر ہونے والوں کی تعداد اب کم ہو رہی ہے ۔اور شفایاب ہونے والوں کی تعداد میں اضافہ ہو رہا ہے ۔ انھوں نے بتایا کہ اورنگ آباد میں روبصحت ہونے والوں کی تعداد مہاراشٹرا کے دوسرے اضلاع کے مقابلے میں سب سے اچھی، 90 فی صد ہے ، اسی طرح شرح اموات بھی ابتداء کے مقابلے میں اب کم ہو کر 2.2 فی صد پر آگئی ہے ۔ اسے اور کس طرح کم کیا جا سکتا ہے ، اس پر توجہ مرکوز کی جا رہی ہے ۔