ہانگ کانگ ۔ یکم جنوری (سیاست ڈاٹ کام ) شمالی کوریائی لیڈر کم جونگ اْن نے نیوکلیئر ہتھیار سازی اور بیلسٹک میزائل تیار کرنے پر خود سے عائد پابندی کو ختم کر دیا ہے۔ انہوں نے نئے ہتھیار تیار کرنے اور اْن کے تجربات کی ہدایات جاری کر دی ہیں۔ شمالی کوریا کی سرکاری نیوز ایجنسی کے مطابق جلد ہی دنیا اسٹریٹیجک ہتھیاروں کا مشاہدہ کرے گی۔ یہ پابندی امریکی صدر ڈونالڈ ٹرمپ سے ملاقات کے بعد کمیونسٹ ملک کے لیڈر نے خود سے عائد کی تھی۔ اس پابندی کے خاتمے کے اعلان پر امریکی وزیر خارجہ مائیک پومپیو نے کم جونگ اْن سے کہا ہے کہ وہ پابندی ختم کرنے کے بجائے کوئی متبادل راستہ اختیار کریں اور واضح کیا کہ امریکہ شمالی کوریا کے ساتھ کسی بھی قسم کی مخاصمت میں دلچسپی نہیں رکھتا۔
