سری نگر۔29 اپریل (سیاست ڈاٹ کام) جنوبی کشمیر کے ضلع شوپیاں کے میلہورہ زینہ پورہ علاقے میں منگل کو شروع ہونے والی جنگجوؤں اور سیکورٹی فورسز کے مابین جاری تصادم آرائی چہارشنبہ کی دوپہر کو 3 جنگجوؤں کی ہلاکت اور ایک افسر سمیت دو فوجی اہلکاروں اور ایک خاتون کے زخمی ہونے پر اختتام پذیر ہوئی۔سرکاری ذرائع نے بتایا کہ شوپیاں کے میلہورہ علاقے میں منگل کی سہ پہر کو جنگجوؤں اور سیکورٹی فورسز کے درمیان شروع ہونے والی تصادم آرائی میں تین جنگجو ہلاک جبکہ ایک فوجی افسر، ایک فوجی جوان اور ایک خاتون زخمی ہوئے ۔انہوں نے کہا کہ زخمی خاتون جس کی شناخت شہنازہ بانو کے بطور ہوئی ہے ، کو علاج ومعالجے کیلئے ہسپتال منتقل کیا گیا ہے ۔جنگجوؤں کے چھپے ہونے کی مصدقہ اطلاع ملنے پر فوج، سی آر پی ایف اور جموں و کشمیر پولیس کے سپیشل آپریشنز گروپ کی ایک مشترکہ ٹیم نے منگل کی سہہ پہر کو شوپیاں کے میلہورہ علاقے کو محاصرے میں لے کر تلاشی کارروائیاں شروع کی تھیں۔انہوں نے بتایا کہ جوں ہی سیکورٹی فورسز کی ایک ٹیم مشتبہ مقام کے نزدیک پہنچی تو وہاں پناہ لئے جنگجوؤں نے اس پر فائرنگ شروع کی جس کے نتیجے میں طرفین کے درمیان تصادم چھڑ گیا۔