کیف ۔ 20 اکتوبر (ایجنسیز) یوکرینی صدر ولودومیر زیلنسکی نے کہا ہے کہ اگر سہ فریقی یا شٹل ڈپلومیسی میٹنگ کے لئے بلایا گیا تو بڈاپسٹ جاؤں گا۔ تاہم وہ بڈاپسٹ کو پوٹن کے ساتھ ملاقات کے لیے بہترین مقام کے طور پر نہیں دیکھتے۔ غیرملکی میڈیا کے مطابق یوکرین کے صدر ولودومیر زیلنسکی نے کہا ہے کہ روسی صدر پوٹن ڈونیٹسک اور لوہانسک ریجن پرمکمل قبضہ چاہتے ہیں اور ان علاقوں پر قبضے کے بعد وہ یہ دکھانا چاہتے ہیں کہ وہ جنگ جیت چکے ہیں۔ یوکرینی صدر نے بتایا کہ وہ اس ہفتہ یورپی رہنماؤں سے ملیں گے جو یوکرین کی مکمل حمایت کرتے ہیں۔ انہوں نے کہا کہ ٹرمپ پوٹن سے ایک اور ملاقات کا موقع ملنے تک روس سے کشیدگی نہیں چاہتے، ہم وہیں کھڑے ہیں جیسے ہم پہلے فرنٹ لائن پر کھڑے تھے۔ یوکرینی صدر نے کہا کہ وہ بڈاپسٹ کو پوٹن کے ساتھ ملاقات کے لیے بہترین مقام کے طور پر نہیں دیکھتے۔ زیلنسکی نے ہتھیاروں کی خریدو فروخت کے حوالے سے واضح کیا کہ اگر امریکہ یوکرین کو میزائل دیتا ہے تو یوکرین امریکہ کو ڈرون فراہم کرنے کو تیار ہے، جبکہ یوکرین 25 پیٹریاٹ ایئر ڈیفنس سسٹم خرید نے کے لیے امریکہ سے معاہدے کی تیاری کر رہا ہے۔ یوکرین اور امریکہ کے مابین ممکنہ معاشی تعاون کے بارے میں انہوں نے کہا کہ امریکی توانائی کمپنیاں یوکرین کی مارکیٹ میں داخل ہونا چاہتی ہیں جبکہ یوکرین امریکہ کے تعاون سے بحیرہ اسود پر ایل این جی ٹرمینل بنانے پر غور کر رہا ہے۔