ڈھاکہ ۔ شکیب الحسن کے بعد بنگلہ دیش کے ایک اور سابق کپتان کے خلاف مقدمہ درج کر لیاگیا۔تفصیلات کے مطابق سابق کپتان مشرفی مرتضیٰ کو بھی ایک مقدمے میں نامزد کردیاگیا ہے۔ طالب علموں پر حملے کے الزام میں 90 افراد کو نامزد کیا گیا ہے، ان میں مشرفی مرتضیٰ بھی شامل ہیں۔ ان افراد پر حالیہ تحریک کے دوران طالب علموں پر حملوں کا الزام ہے۔ شیخ مصطفیٰ المضاہد الرحمٰن نے ناریل صدر پولیس اسٹیشن میں مقدمہ درج کیا ہے جس میں مشرفی مرتضیٰ کے والد کو بھی حملوں کے الزام میں نامزد کیا گیا ہے۔ واضح رہے کہ سابق کپتان شکیب الحسن پر بھی بنگلہ دیش میں قتل کے الزام میں مقدمہ درج ہے۔ شکیب الحسن پاکستان سے واپس اپنے وطن بنگلہ دیش نہیں گئے تھے، وہ براستہ دبئی انگلینڈ چلے گئے ۔ یاد رہے کہ مشرفی مرتضیٰ نے کرکٹ سے سبکدوشی کے بعد سیاست میں قدم رکھا اور 2018ء میں شیخ حسینہ کی عوامی لیگ میں شمولیت اختیار کی اور ضلع ناریل 2 سے رکنِ پارلیمنٹ منتخب ہوئے تھے۔
