کولمبو: بنگلہ دیش کے آل راونڈر شکیب الحسن اورہندستانی آل راونڈر یوسف پٹھان نے لنکا پریمئر لیگ (ایل پی ایل) کے دوسرے ایڈیشن کے لئے رجسٹریشن کرایا ہے ۔ ٹورنمنٹ کے منتظمین کے مطابق کل ملاکر 11ممالک کے کٹروں نے ٹورنمنٹ میں کھیلنے میں دلچسپی ظاہر کی ہے ۔دراصل گزشتہ سال بنگلہ دیش کرکٹ بورڈ (بی سی بی) نے اپنے کھلاڑیوں کو ٹورنمنٹ میں حصہ لینے کی اجازت دینے سے انکار کردیا تھا لیکن اس بار ڈرافٹ سے پہلے شکیب کے علاوہ ملک کے چھ دیگر اہم کرکٹروں نے رجسٹریشن کرایا ہے جن میں تجربہ کار اور اہم بلے باز تمیم اقبال بھی شامل ہیں۔ جنوبی افریقہ کی سفید گیند کی ٹیم کے کپتان تیمبا باووما نے ٹورنمنٹ کے لئے خود کو دستیاب کرایا ہے ۔ ان کی ٹیم کے دو اہم اسپنروں کیشو مہاراج اور تبریز شمسی بھی ٹورنمنٹ پر نظر لگائے ہوئے ہیں۔ اس سال کی شروعات میں آخری بار بگ بیاشلیگ (بی بی ایل) میں کھیلنے والے ریٹائرڈ فاسٹ بولر مورنی مورکل نے بھی رجسٹریشن کرایا ہے ۔اس درمیان یہ دیکھنا دلچسپ ہوگا کہ ہندستان کے تجربہ کار کھلاڑی یوسف پٹھان کوکوئی خریدار ملتا ہے یا نہیں۔ انہوں نے اس سال کی شروعات میں تمام فارمیٹ سے ریٹائرمنٹ لینے کا اعلان کیا تھا۔ یوسف کے بھائی عرفان پٹھان کینڈی ٹسکرس ٹیم کا حصہ ہیں۔نیوزی لینڈ کے میشل میک لنگھن، زمبابوے کے برینڈن ٹیلر، امریکہ کے علی خان اور نیپال کے سندیپ لیمی چھانے بھی ایل پی ایل کے دوسرے سیزن میں معاہدہ کرنے پر نظر لگائے ہوئے ہیں۔آسٹریلیا ئی آل راونڈر جیمس فاکر حال ہی میں اختتام پذیر پاکستان سوپر لیگ میں شاندار کارکردگی کا مظاہرہ کرنے والے کھلاڑیوں میں سے ایک ہیں جن کی ایل پی ایل میں زیادہ مانگ ہونے کی امید ہے ۔ویسٹ انڈیز کے کئی کھلاڑیوں نے بھی ڈرافٹ کے لئے رجسٹریشن کرایا ہے ، جس میں ٹی۔20کے نائب کپتان نکولس پورن بھی شامل ہیں۔سری لنکا کرکٹ کے نائب صدر روین وکرم رتنے نے ایک بیان میں کہاکہ گزشتہ سال کی کامیابی سے یقینا کئی کرکٹ کھیلنے والے ممالک کے زیادہ کھلاڑیوں کے ایل پی ایل میں کھیلنے کی امید ہے جو لیگ اور سری لنکا کرکٹ کے لئے ایک بہت اچھا اشارہ ہے ۔
