دبئی۔کولکتہ نائٹ رائیڈرز (کے کے آر) کے اسٹار آل راؤنڈر شکیب الحسن آئی پی ایل کا فائنل چینائی سوپر کنگز (سی ایس کے) کے خلاف کھیلنے کے بعد آج عمان روانہ ہوں گے ، جہاں وہ آئی سی سی ٹی 20 ورلڈ کپ کے کوالیفائی مرحلے کے لئے بنگلہ دیش ٹیم میں شامل ہوں گے۔ بنگلہ دیش کرکٹ بورڈ (بی سی بی) کے ایک عہدیدار نے اس کی تصدیق کی ہے۔قبل ازیں بی سی بی نے زور دے کرکہا تھا کہ وہ دوسرے کوالیفائر میچ کے بعد شکیب کے آئی پی ایل کے فائنل میں شرکت کرنے کے بارے میں حتمی فیصلہ کرے گا۔ بی سی بی کے کرکٹ آپریشن آفیسر نے ایک بیان میں کہا منصوبہ یہ ہے کہ شکیب آئی پی ایل فائنل کے فوراً بعد بنگلہ دیش کی ٹیم میں شامل ہو جائیں گے کیونکہ 17 اکتوبرکو اسکاٹ لینڈ کے خلاف ہمارا اہم کوالیفائنگ میچ ہے۔
