ڈھاکہ ۔31 اکٹوبر (سیاست ڈاٹ کام ) انٹرنیشنل کرکٹ کونسل(آئی سی سی) کی جانب سے شکیب الحسن پر عائد کی گئی دو سال کی پابندی کے خلاف بنگلہ دیش کے عوام نے بڑے پیمانے پر احتجاج کرتے ہوئے اسٹار آل راؤنڈر کی پابندی ختم کرنے کا مطالبہ کیا۔ آئی سی سی نے سٹہ بازوں کی جانب سے رابطے کی اطلاع فراہم نہ کرنے پر بنگلہ دیشی سوپر اسٹار آل راؤنڈر شکیب الحسن کو اینٹی کرپشن قوانین کی خلاف ورزی کا مرتکب قرار دیتے ہوئے ان پر 2سال کی پابندی عائد کردی تھی۔شکیب کے کیریئر کے دوران اچھے رویے اور اپنی غلطی کو تسلیم کرنے پر ان کی ایک سال کی سزا معطل کر دی گئی ہے البتہ وہ اگلے ایک سال تک کرکٹ نہیں کھیل سکیں گے۔ اس پابندی کے خلاف سینکڑوں بنگلہ دیشی شائقین نے 32 سالہ اسٹار آل راؤنڈر پر لگائی گئی پابندی کو ناانصافی قرار دیتے ہوئے ان کے آبائی علاقے مگورا میں احتجاج کیا۔ مگورا میں 700 سے زائد لوگوں نے احتجاج کرتے ہوئے دورہ ہند سے قبل اپنے ملک کے سب سے بڑے سوپر اسٹار کرکٹر پر لگائی گئی پابندی کو سازش قرار دیا اور اس پابندی کو ختم کرنے کا مطالبہ کیا۔ پولیس عہدیدار سیف الاسلام نے کہا کہ مظاہرین نے نعرے بازی کی اور ہائی وے پر مارچ کیا جبکہ آئی سی سی کے فیصلے کے خلاف انسانی ہاتھوں کی زنجیر بھی بنائی۔ اس کے علاوہ بنگلہ دیش کے دارالحکومت ڈھاکہ میں بھی آئی سی سی کے اس فیصلے کے خلاف مختلف مقامات پر احتجاجی مظاہرے کیے گئے۔بنگلہ دیش کے ٹسٹ اور ٹی20 ٹیم کے کپتان شکیب الحسن اپنے ملک کے سب سے بڑے سوپر اسٹار ہیں اور ان کی پابندی سے آئندہ سال ٹی20 ورلڈ کپ میں بنگلہ دیش کی جیت کی امیدوں کو شدید دھکا لگا ہے۔ آئندہ سال ٹی20 ورلڈ اکتوبر میں آسٹریلیا میں مقرر ہے اور بنگلہ دیش کے ٹسٹ اور ٹی20 ٹیم کے کپتان شکیب الحسن کی انٹرنیشنل کرکٹ میں دوبارہ واپسی 29 اکتوبر 2020 کو ہو گی جس کی وجہ سے وہ ایونٹ میں شرکت نہیں کر سکیں گے۔
56 ٹسٹ، 206 ونڈے اور 76ٹی20 میچوں میں بنگلہ دیش کی نمائندگی کا اعزاز رکھنے والے شکیب 2009 کے بعد سے صف اول کے آل راؤنڈرز میں سے ایک ہیں اور رواں سال ورلڈ کپ میں بھی انہوں نے شاندار کھیل پیش کیا تھا۔ انگلینڈ میں کھیلے گئے ورلڈ کپ میں شکیب نے 600 سے زائد رنز اسکور کرنے کے علاوہ 11وکٹیں بھی حاصل کی تھیں جبکہ وہ رواں سال ونڈے کرکٹ میں تیز ترین 5 ہزار رنز اور 250 وکٹیں لینے والے کرکٹر بھی بن گئے تھے۔ بنگلہ دیش کے نئے ٹی20 کپتان نے شکیب سے ہمدردی کا اظہار کرتے ہوئے اس پابندی کو افسوسناک قراردیا اورکہا کہ شکیب ہماری ٹیم کے سب سے اہم کھلاڑی تھے اور ان پر پابندی سے ہم سب بہت افسردہ ہیں۔انہوں نے کہا کہ ہو سکتا ہے کہ شکیب سے کوئی غلطی ہوئی ہو لیکن انہوں نے کوئی جرم نہیںکیا، ہم اب بھی شکیب کی حمایت کرتے ہیں اور ان سے محبت کرتے رہیں گے۔ بنگلہ دیش کرکٹ بورڈ کے سربراہ نظم الحسن نے کہا کہ شکیب پر پابندی کو ملکی کرکٹ کے لیے بڑا صدمہ قرار دیا۔انہوں نے کہا کہ ہمارے پاس شکیب کا کوئی متبادل نہیں اور جب میں نے پہلی مرتبہ یہ سنا تو مجھے شدید غصہ آیا کہ شکیب نے اس بارے میں مجھے کیوں نہیں بتایا، ہم نے شکیب کو ٹیم کا حصہ رکھ کر دورہ ہند کی منصوبہ بندی کی ہے۔ یاد رہے کہ شکیب حالیہ برسوں میں بنگلہ دیش کے نمبر ایک کھلاڑی کی حیثیت حاصل کرچکے ہیں ۔