بودھن ۔22 نومبر ۔ ( سیاست ڈسٹرکٹ نیوز ) بودھن میں دھیرے دھیرے انتخابی سرگرمیاں زور پکڑتی نظر آرہی ہیں۔ اسسٹنٹ کمشنر پولیس بودھن کرن کمار نے ایڈپلی منڈل میں بی آر ایس اور حزب مخالف سیاسی جماعتوں کانگریس اور بی جے پی کے درمیان ہوئے تصادم کے تعلق سے میڈیا سے مخاطب کرتے ہوئے کہا کہ شکیل عامر ایم ایل اے بودھن امیدوار بی آر ایس پارٹی بودھن کے ایٖڈپلی منڈل کے مواضعات کے انتخابی دورہ سے واپس لوٹتے وقت اپوزیشن سیاسی جماعتوں کے قائدین اور سرگرم کارکنوں نے منصوبہ بند طریقہ پر ساٹاپور گیٹ کے قریب شکیل عامر کے قافلہ پر حملہ کردیا ۔ اے سی پی نے بتایا کہ وہ کمشنر پولیس ضلع نظام آباد کی ہدایت پر زائد پولیس دستوں کے ساتھ موقع واقعہ پر سرکل انسپکٹر سرینواس راج کے ہمراہ پہونچ گئے اور دو گروہوں کے درمیان ہونے والے امکانی تصادم کو روک دیا ۔ اے سی پی نے کہاکہ پولیس نے بی آر ایس پارٹی کے قافلہ پر حملہ کرنے والے افراد کی شناخت کرلی ہے اور بہت جلد اُن کے خلاف مقدمہ درج کرکے تحقیقات کی جائیگی۔
