نئی دہلی: شہریت ترمیمی قانون یعنی CAA ملک میں نافذ ہو گیا ہے۔ اس پر چل رہی سیاست کے درمیان مرکزی وزیر داخلہ امیت شاہ نے واضح کیا کہ CAA یعنی شہریت ترمیمی قانون کو کبھی واپس نہیں لیا جائے گا۔ ایک نیوز ایجنسی کو دیے گئے انٹرویو میں امیت شاہ نے کہا کہ سی اے اے قانون کبھی واپس نہیں لیا جائے گا۔ اپنے ملک میںکسی کو بھی ہندوستانی شہریت فراہم کرنا ہمارا بنیادی حق ہے۔ ہم اس کے ساتھ کبھی سمجھوتہ نہیں کریں گے۔ اس سے پہلے مرکزی وزیر داخلہ امیت شاہ نے منگل کو یقین دہانی کرائی تھی کہ شہریت (ترمیمی) ایکٹ میں کسی کی شہریت چھیننے کا کوئی لزوم نہیں ہے۔اپوزیشن کے اس الزام پر کہ بی جے پی سی اے اے کے ذریعہ نیا ووٹ بینک بنا رہی ہے امیت شاہ نے کہا کہ اپوزیشن کے پاس کوئی اور کام نہیں ہے۔ ان کی تاریخ یہ ہے کہ وہ جو کہتے ہیں وہ نہیں کرتے۔ وزیر اعظم نریندرمودی کی تاریخ یہ ہے کہ بی جے پی نے جو کچھ بھی کہا اور نریندر مودی نے جو کچھ بھی کہا وہ پورا کیاگیاہے۔ وزیر اعظم مودی کی ہر گیارنٹی پوری ہے۔ انہوں نے یہاں تک کہا کہ سرجیکل اسٹرائیکس اور فضائی حملوں میں سیاسی فائدہ ہے تو کیا ہمیں دہشت گردی کے خلاف کارروائی نہیں کرنی چاہئے؟ انہوں نے یہ بھی کہا کہ آرٹیکل 370 کو ہٹانا بھی ہمارے سیاسی فائدے کے لیے تھا۔ ہم 1950 سے کہہ رہے ہیں کہ ہم آرٹیکل 370 کو ہٹا دیں گے۔سی اے اے کے خلاف نہ صرف ملک کے مختلف حصوں میں احتجاج کیا جارہا ہے بلکہ لوک عدالت سے بھی رجوع ہوئے ہیں ۔