مسلم ممالک امریکہ کیخلاف متحد ہوجائیں:صدر ایران حسن روحانی
انقرہ؍ تہران۔5جنوری ۔(سیاست ڈاٹ کام) تُرکی کے صدر رجب طیب اُردوغان نے ایرانی سپاہ پاسداران انقلاب کے عراق میں امریکی فوج کے آپریشن میں مارے جانے والے قاسم سلیمانی کی موت کو ’شہادت‘ قرار دیتے ہوئے ان کی موت پر دکھ اور افسوس کا اظہار کیا ہے۔ ’رشیا ٹوڈے‘ کے مطابق جنرل قاسم سلیمانی کی ہلاکت پرتبصرہ کرتے ہوئے ترک صدرنے کہا کہ مجھے شہید قاسم سلیمانی کے کھو جانے پر گہرا دکھ اور صدمہ پہنچا ہے۔ دکھ اور مشکل کی اس گھڑی میں ہم ایرانی حکومت اور عوام کے ساتھ ہیں۔ میں ایرانی عوام کے غم وغصے کوسمجھ سکتا ہوں۔اُردوغان نے اپنے ایرانی ہم منصب حسن روحانی کے ساتھ ٹیلیفون پر گفتگو کرتے ہوئے کہا کہ قاسم سلیمانی کو قتل کرکے امریکہ نے حماقت کی ہے۔ان کا کہنا تھا کہ خطے میں بیرونی مداخلت اور مقامی سطح پر جاری لڑائیاں بدامنی کا اصل سبب ہیں۔ ایران کی فارس نیوزایجنسی کے مطابق صدر حسن روحانی نے ترک صدر کی طرف سے سلیمانی کے قتل پر تہران سے یکجہتی کے اظہار پر ان کا خصوصی شکریہ ادا کیا ہے۔ ایرانی صدر نے قاسم سلیمانی کے قتل کو’عظیم سانحہ‘ قرار دیتے ہوئے کہا کہ خطے کے مختلف مسائل کے حوالے سے انقرہ اور تہران کے موقف میں ہم آہنگی پائی جاتی ہے۔ایرانی صدر روحانی نے اپنے ترک ہم منصب اُردوغان کو جلد از جلد تہران کے دورے کی دعوت دیتے ہوئے کہا کہ اگر ہم (مسلم ممالک ) ان امریکی اقدامات کے مقابلہ میں متحد نہیں ہوئے تو اس سے ہم سب کو ایک سنگین خطرہ لاحق ہوجائیں گے۔