ابوظہبی : امارات کے صدر شیخ محمد بن زاید اور یورپی کمیشن کی صدر ارسلا وان ڈرلین نے ہفتہ ٹیلی فون پر رابطہ کیا ہے۔وام کے مطابق رابطے کے دوران امارات اور یورپی یونین کے سٹریٹجک تعلقات اورعلاقائی صورتحال پر تبادلہ خیال کیا گیا۔امارات اور یورپی یونین کے درمیان تعلقات کے مختلف پہلووں، انہیں مضبوط بنانے اور مشترکہ مفادات کے حصول کے طریقوں پر بات چیت کی گئی۔دونوں رہنماوں نے مشترکہ دلچسپی کے متعدد علاقائی اور بین الاقوامی امور خصوصا مشرق وسطی کی صورتحال کا بھی جائزہ لیا۔انہوں نے غزہ پٹی اور لبنان میں فوری جنگ بندی کی اہمیت پر زور دیا اور کہا ’بین الاقوامی قانون کے مطابق شہریوں کے مکمل تحفظ کو یقینی بنانے کی ضرورت ہے جبکہ ان کے مصائب دور کرنے کیلئے انسانی امداد کی وافر اور محفوظ فراہمی کو یقینی بنانے کی ضمانت دی جائے‘۔خطے میں کشیدگی کے خاتمہ اور تنازعات کے پھیلاو کو روکنے کیلئے ہر ممکن کوششیں کرنے کی ضرورت پر زور دیا گیا جس سے علاقائی سلامتی اور استحکام کو خطرہ لاحق ہے۔انہوں نے دو ریاستی حل پر مبنی منصفانہ، جامع اور پائیدار امن کی بھی بات کی۔
