سڈنی۔4 جنوری (سیاست ڈاٹ کام ) پاکستان سوپر لیگ (پی ایس ایل) کے اعلان کے ساتھ ہی شائقین کرکٹ کے جوش و خروش میں اضافہ ہوگیا اور وہ پوری شدت کے ساتھ لیگ کے آغاز کے منتظر ہیں۔ شائقین کرکٹ کے ساتھ مقامی اور انٹرنیشنل کرکٹرز بھی پاکستان سوپر لیگ کے پانچویں ایڈیشن کے حوالے سے انتہائی پرجوش ہیں اور انہیں میں سے ایک سابق آل راؤنڈر شین واٹسن بھی ہیں۔ واٹسن بھی پاکستان سوپر لیگ 2020 میں شرکت کے لیے پرعزم ہیں اور انہوں نے شائقین کرکٹ کے نام اردو میں خصوصی پیغام دیا۔ کوئٹہ گلیڈی ایٹرز کی نمائندگی کرنے والے عالمی شہرت یافتہ سوپراسٹار نے پاکستان کی سرکاری زبان اردو میں دیے گئے پیغام میں کہا کہ پاکستانیوں، شین واٹسن آ رہا ہے پاکستان۔ انہوں نے شائقین کرکٹ سے کوئٹہ گلیڈی ایٹرز کی حمایت کرنے کی درخواست کرتے ہوئے کہا کہ آپ سب پرپل فورس ی حمایت کریں، اس بار ہو گا کوئٹہ، کوئٹہ۔ یاد رہے کہ پاکستان کرکٹ بورڈ نے نئے سال کے پہلے دن پاکستان سوپر لیگ 2020 کے شیڈول کا اعلان کردیا تھا اور ایونٹ کا پہلا میچ دفاعی چیمپیئن کوئٹہ گلیڈی ایٹرز اور اسلام آباد یونائیٹڈ کے درمیان 20 فروری کو کھیلا جائے گا۔