نارائن پیٹ میں ٹی یو ڈبلیو جے کا اجلاس ، 200 سے زائد صحافیوں کی شرکت، مہمانوں کو تہنیت کی پیشکشی
نارائن پیٹ۔ 27 اکٹوبر ( سیاست ڈسٹرکٹ نیوز) صحافت جمہوریت کا چوتھا ستون ہے ، جمہوریت میں سماجی انصاف ،صحیح حکمرانی عدل و انصاف کے قیام میں حکومت کے ساتھ صحافت کا ساتھ ہو تو ہندوستانی سماج میں انقلاب آسکتا ہے ، ان خیالات کا اظہار ضلع کلکٹر نارائن پیٹ سکتا پٹنایک نے نارائن پیٹ ضلع مستقر کے لکشمی گارڈن بنکویٹ ہال میں تلنگانہ یونین آف ورکنگ جرنلسٹ ( آئی جے یو) ضلع ناراین پیٹ کے پہلے ضلع سطح کے پرنٹ والکٹرانک میڈیا کے صحافیوں کے اجلاس کو خطاب کرتے ہوئے کیا ، انہوں نے کہا کہ صحافت عوام کی آواز ہے حکومت کو صحافت کے ذریعہ عوامی مسائل سے واقفیت حاصل ہوتی ہے ،انہوں نے بے باک صحافت کے ذریعہ عوامی مسائل کو ایوانوں تک پہچانے کی ضرورت پر زور دیا ، ضلع ایس پی مسٹر یوگیش گوتم نے کہا کہ صحافت پولس کی آنکھ ہے۔ انہوں نے قیام امن اور مجرمین کو قرار واقعی سزا دلانے میں پولس کے ساتھ تعاون کی اپیل کی ، ریاستی صدر ٹی یو ڈبلیو جے جناب وراحت علی نے اپنی تقریر میں صحافیوں کو اس بات کے لئے ابھارا کہ ہم اپنے قلم کی طاقت کو سمجھیں ، اور اس کے ذریعہ ہم اپنے مسائل کے علاوہ عوامی مسائل کو حل کرنے کے لئے اس قلمْ کو استعمالْ کریں ۔ انہوں نے جواں سال صحافی جناب عامر علی خان ، ایم ایل سی سے اس توقع کا اظہار کیا کہ وہ صحافیوں کے مسائل کو حکومت کے ایوانوں تک پہنچائیں گے۔ ضلع صدر کانگریس پارٹی نارائن پیٹ مسٹر پرشانت ریڈی ،ٹی یو ڈبلیو جے کے جنرل سکریٹری گوڑ کے علاوہ ضلع کنوینر نارائن ریڈی ، ریاستی اڈویزری کمیٹی کے رکن بھیم سین راؤ ، رکن بلدیہ مہش کمار ، بی جے پی قائد ، سی پی آئی کے نمائندوں کاشی ناتھ ، بی رامو ، سینئر صحافی و نمائندہ سیاست نارائن پیٹ جناب مجاہد صدیقی نے بھی مخاطب کیا جبکہ ڈاکٹر قطب الدین ماہر نفسیات شکاگو نے بھی ویڈیو کال کے ذریعہ نارائن پیٹ میں ٹی یو ڈبلیو جے کے ضلعی کانفرنس میں شرکاء سے نیک تمناؤں کا اظہار کیا۔ اس موقع پر تمام مہمانان خصوصی کی شال پوشی کی گئی اور مومنٹو پیش کیے گئے ، نارائن پیٹ ضلع کے سطح کے اس پہلے ٹی یو ڈبلیو جے کے اجلاس میں ضلع کے اہم مقامات ، مکتھل، کوسگی ، اوٹکور ، مدور ، دھنواڑہ ، مریکل ودیگر مقامات کے تقریباً دو سو سے زائد تلگو اردو انگلش ، پرنٹ والکٹرانک میڈیا کے صحافیوں نے شرکت کی ۔